हिउँदको माग व्यवस्थापनका लागि विद्युत् प्राधिकरणद्वारा पाँच सदस्यीय समिति गठन

काठमाण्डौ – नेपाल विद्युत् प्राधिकरणले आउँदो सुक्खायाम अर्थात् हिउँदमा काठमाण्डौ उपत्यकालगायतका क्षेत्रमा बढ्ने विद्युत् माग व्यवस्थापनका लागि आवश्यक तयारी शुरु गरेको छ ।

हिउँदको विद्युत् माग र आपूर्ति व्यवस्थापनका सम्बन्धमा आवश्यक अध्ययन तथा अन्य कार्यको व्यवस्थापनका लागि पाँच सदस्यीय समिति गठन गरिएको छ ।

भोटेकोशी हुँदै त्रिशूली नदीमा आएको बाढीका कारण त्यस क्षेत्रमा सञ्चालित जलविद्युत् केन्द्रमा क्षति पुगेको र विद्युत् उत्पादन बन्द भएको अवस्थामा हिउँदमा विद्युत् माग र आपूर्ति व्यवस्थापनका लागि आवश्यक तयारी थालिएको प्राधिकरणले जनाएको छ ।

प्राधिकरणका कार्यकारी निर्देशक दीर्घायुकुमार श्रेष्ठको अध्यक्षतामा भएको बैठकले बागमती प्रादेशिक कार्यालयका निर्देशकको संयोजकत्वमा पाँच सदस्यीय समिति गठन गरेको हो । समितिलाई दैनिक कार्यप्रगति विवरण कार्यकारी निर्देशकसमक्ष पेस गर्न तथा कार्यान्वयनका क्रममा देखिएका समस्या तत्काल जानकारी गराउन निर्देशन दिइएको छ ।

कार्यकारी निर्देशक श्रेष्ठले विद्युत् माग र आपूर्ति व्यवस्थापनमा केही चाप परे पनि हिउँदमा लोडसेडिङ नहुने बताउनुभएको । उहाँले विद्युत् आपूर्ति व्यवस्थापनका लागि आवश्यक तयारी अहिलेदेखि अघि बढाएको बताउनुभयो ।

पछिल्लो बैठकले काठमाण्डौ उपत्यका तथा आसपासका क्षेत्रमा निर्माणाधीन प्रसारण तथा वितरणतर्फका आयोजनाको काम सम्पन्न गर्ने समयसीमा समेत तोकेको छ ।

त्यसैगरी, बाढीबाट प्रभावित नुवाकोट र रसुवाको विद्युत् आपूर्तिलाई भरपर्दो बनाउन विभिन्न विकल्पबारे छलफल गरी आवश्यक प्रक्रिया अघि बढाउने निर्णय गरेको छ । बाढीबाट क्षति पुगेको देवीघाट सबस्टेसन सञ्चालनमा ल्याउने सम्भावनाबारे स्थलगत अध्ययन गर्न टोलीसमेत परिचालन गरिएको छ ।