इटहरीमा सीप तथा रोजगार मेला शुरू

काठमाण्डाै – सुनसरीको इटहरीमा सात दिने ‘सीप तथा रोजगार मेला–२०८३’ शुरू भएको छ । ‘सीप र रोजगारी : साझा जिम्मेवारी’ भन्ने नाराका साथ आयोजना भएकाे मेलाको आज सभामुख डोलप्रसाद अर्यालले उद्घाटन गर्नुभएको हो ।

युवा, श्रम तथा रोजगार मन्त्रालयले स्वदेशमै रोजगारीका अवसर सिर्जना गर्ने उद्देश्यसहित आयोजना गरेको यो मेला यही असोज २० गतेसम्म सञ्चालन हुनेछ ।

कोशी प्रदेशलाई लक्षित गरी शुरू भएकाे मेलामा ७५ भन्दा धेरै स्टल राखिएका छन् । १०० भन्दा धेरै रोजगारदाता तथा तालिम प्रदायक संस्थाहरूको सहभागिता रहेको मेलामा युवाहरूले सीप, परामर्श र रोजगारीका अवसरबारे प्रत्यक्ष जानकारी लिन सक्नेछन् ।

रोजगारदाताले पनि आफूलाई चाहिने जनशक्ति खोज्न र मेलास्थलमै अन्तर्वार्ता लिएर छनोट गर्न सक्ने मन्त्रालयका सचिव दीपक काफ्लेले जानकारी दिनुभयो ।

मेलामा एआई, डिजिटल मार्केटिङ, कुकिङ र गाडी मर्मतजस्ता १० वटा विधाका छोटा अवधिका तालिमसमेत चलाइँदैछ । मेलालाई प्रभावकारी बनाउन दर्ता, मेला अवधि र मेलापछिको परामर्श गरी तीन चरणमा विभाजन गरिएको छ ।

यस्तै कार्यक्रम अवधिभर युवाहरूका लागि ‘करियर उडान संवाद शृङ्खला’ र विभिन्न विचार–विमर्शका कार्यक्रमहरू पनि सञ्चालन हुने आयोजकले जनाएको छ ।

मन्त्रालयले कोशीबाट शुरू गरेको मेला क्रमशः सात वटै प्रदेशमा आयोजना गर्ने जनाएको छ ।