बाढीपहिरोले म्याग्दीमा जलविद्युत् आयोजना र प्रसारण लाइनमा क्षति, मर्मत तीव्र

काठमाण्डौ – असोज ८ देखि ११ गतेसम्म परेको वर्षापछि आएको बाढीपहिरोले म्याग्दीमा जलविद्युत् आयोजना र प्रसारण लाइनमा क्षति पुर्‍याउँदा विद्युत् उत्पादन तथा आपूर्ति प्रभावित भएको छ ।

अन्नपूर्ण गाउँपालिका–४ नारच्याङमा रहेको ६ मेगावाट क्षमताको रेलेखोला जलविद्युत् आयोजनाको बाँधमा बाढी पस्दा विद्युत् उत्पादन पूर्णरूपमा बन्द भएको छ ।

रेलेखर्क क्षेत्रमा पहिरो गएपछि रेलेखोलामा बाढीको सतह बढेर बाँधमा लेदो तथा माटो थुप्रिएको र भौतिक संरचनामा समेत क्षति पुगेको आयोजनाका प्रमुख दार्शनिक काफ्लेले जानकारी दिनुभयो । बाँधसम्म पुग्ने पहुँचमार्गसमेत पहिरोका कारण अवरुद्ध भएकाले बाढी पन्छाएर आयोजना सञ्चालन गर्न समस्या भएको उहाँले बताउनुभयो ।

गएको वर्ष निर्माण सम्पन्न भएको आयोजनाको विद्युत् २२० केभी क्षमताको दाना सबस्टेसनमार्फत राष्ट्रिय प्रणालीमा जोडिएको थियो । बाढीपहिरोका कारण दाना–खुर्कोट २२० केभी प्रसारण लाइनमा पनि ठूलो क्षति पुगेको छ । 

कालीगण्डकी नदीमा आएको बाढीले अन्नपूर्ण गाउँपालिकाको पोखरेबगर, धिरच्याङ र दोवाको भिरकाटे क्षेत्रमा चारवटा टावर ढालेपछि प्रसारण लाइन अवरुद्ध भएको हो । टावर ढल्दा म्याग्दीको अन्नपूर्ण गाउँपालिका र मुस्ताङमा विद्युत् आपूर्ति प्रभावित भएको छ ।

प्रसारण लाइन अवरुद्ध हुँदा म्याग्दी र मुस्ताङका १७६ मेगावाट क्षमताका छवटा जलविद्युत् आयोजनाको विद्युत् पनि राष्ट्रिय प्रणालीमा जोडिन सकेको छैन । यसबाट आयोजनाहरूलाई करोडौँ रुपैयाँको नोक्सानी भएको छ ।