दोधारा चाँदनी जोड्ने पुल भत्किएपछि स्थानीय चिन्तित

काठमाण्डौ – कञ्चनपुरको दोधारा चाँदनी नगरपालिका र भीमदत्त नगरपालिकालाई जोड्ने ऐतिहासिक झोलुङ्गे पुलको पिलर भत्किएपछि स्थानीयवासी, व्यवसायी र पर्यटन क्षेत्रमा चिन्ता बढेको छ ।

पूर्ववडा सदस्य भीमबहादुर सिंहले पुल दोधारा चाँदनीको पहिचान र इतिहाससँग जोडिएको भन्दै तत्काल पुनर्निर्माण गर्न माग गर्नुभयो । पिल्लर भत्किएपछि आवागमन बन्द छ ।

महाकाली नदीमा ठूलो बाढी नआए पनि गएको बुधबार बिहान पुलका आठ पिल्लरमध्ये दोधारा चाँदनीतर्फको तेस्रो पिल्लर भत्किएपछि पुलमा आवागमन रोकिएको छ । २२ वर्षअघि निर्माण भएको यो पुल दोधारा चाँदनीलाई जिल्लाको सदरमुकामसँग प्रत्यक्ष जोड्ने महत्वपूर्ण माध्यमका रूपमा रहेको थियो ।

स्थानीयका अनुसार पुल बनेअघि दोधारा चाँदनीका बासिन्दा महाकालीमा डुङ्गा वा भारतको बनवासा पुल हुँदै आवतजावत गर्नुपर्ने बाध्यतामा थिए । पुल बनेपछि आवागमन सहज हुनुका साथै क्षेत्रको पर्यटन र व्यापारसमेत बढेको थियो ।