कुलेखानी जलविद्युत् आयाेजनाकाे बाँध सुरक्षित : मन्त्री श्रेष्ठ

काठमाण्डाै – ऊर्जा, जलस्रोत तथा सिँचाइमन्त्री विराजभक्त श्रेष्ठले पछिल्लो समयको भीषण वर्षाका कारण जोखिममा रहेको भनिएको कुलेखानी जलविद्युत् आयोजनाको बाँध क्षेत्रको स्थलगत निरीक्षण गर्नुभएको छ ।

निरीक्षणपछि मन्त्री श्रेष्ठले बाँध पूर्णरूपमा सुरक्षित र स्थिर रहेको भन्दै सर्वसाधारणलाई ढुक्क रहन आग्रह गर्नुभएको हो । यही असोज ८ देखि १२ गतेसम्मको अविरल वर्षाका कारण कुलेखानी जलाशयमा पानीको सतहले सतर्कता तह पार गरेपछि यसको सुरक्षा र तल्लो तटीय क्षेत्रमा पर्ने प्रभावबारे चासो बढेको थियो ।

यही सन्दर्भमा आज स्थलगत निरीक्षणका लागि पुग्नुभएका मन्त्री श्रेष्ठले बाँधको भौतिक अवस्थाको जानकारी लिनुभएको हो । निरीक्षणका क्रममा नेपाल विद्युत् प्राधिकरणका कार्यकारी निर्देशक दीर्घायुकुमार श्रेष्ठसहितको प्राविधिक टोलीले मन्त्री श्रेष्ठलाई बाँधको अहिलेकाे अवस्था र बाढीको समयमा अपनाइएको सावधानीबारे ब्रिफिङ गराएको थियो । मन्त्री श्रेष्ठले विषम परिस्थितिमा प्राधिकरणले चाैबीसै घण्टा निगरानी राख्दै कुशल व्यवस्थापन गरेको भन्दै प्रशंसा गर्नुभयो ।

यसअघिको बाढीका कारण देशका विभिन्न जलविद्युत् आयोजना तथा प्रसारण लाइनमा क्षति पुगेपछि ऊर्जा प्रणालीमा केही दबाव सिर्जना भएको थियो । तर कुलेखानीको जलाशयमा पानीको राम्रो सञ्चिति भएकाले यसले आउँदाे हिउँदमा विद्युत् आपूर्ति व्यवस्थापनमा ठूलो सहयोग पुग्ने मन्त्री श्रेष्ठले विश्वास व्यक्त गर्नुभयो ।

प्राधिकरणका कार्यकारी निर्देशक दीर्घायुकुमार श्रेष्ठले कुलेखानीलाई नेपाली विद्युत प्रणालीको ‘मेरुदण्ड’ को संज्ञा दिँदै यसले माग उच्च भएको समयको माग धान्न महत्त्वपूर्ण भूमिका खेल्ने बताउनुभयो ।

– न्युज एजेन्सी नेपाल