मुस्ताङको लेतेदेखि कोरलासम्म झन्डै ५०० कन्टेनर रोकिए

काठमाण्डाै – मुस्ताङको लेतेदेखि कोरला नाकासम्म झन्डै पाँच सय वटा कन्टेनर सडकमा रोकिका छन् ।

यही असोज ८ देखि ११ गतेसम्मको वर्षापछिको बाढी, पहिरो र हिमपातले सडक अवरुद्ध भएपछि एक हप्तादेखि ती कन्टेनर रोकिएका हुन् । यस्तै ७० भन्दा धेरै कन्टेनर र एक सयभन्दा धेरै विद्युतीय गाडी जोमसोममा रहेको बसपार्कमा राखिएका छन् ।

कालीगण्डकी करिडोर सडक आयोजनाले जोमसोम–कोरला खण्डमा अवरुद्ध सडक मर्मत गरेपछि मुस्ताङ भन्सार बन्दरगाहमा रोकिएका केही मालवस्तुवाहक कन्टेनर जोमसोम ल्याइएको हो ।

म्याग्दीको पोखरेबगर, कुनौटे र बैसरीलगायतका ठाउँमा अवरुद्ध सडक मर्मत भइरहेको छ । सडक सञ्चालनका लागि अझै कम्तीमा एक हप्ता लाग्ने सडक आयोजनाका प्राविधिकहरूले बताएका छन् ।

चीनबाट कोरला नाका हुँदै नेपाल भित्र्याइएको दशैँ–तिहार लक्षित मालवस्तु समयमै गन्तव्यमा पुर्‍याउन नसक्दा व्यपारीसँगै उपभोक्तासमेत समस्यामा परेका छन् । यसले मुख्य पर्व दशैँकाे अवसरमा पनि नेपाली बजार आर्थिक रूपमा चलायमान हुनसकेको छैन ।