नेभिगेशन
शुक्रबार, मंसिर ४, २०८३

नेपालको आर्थिक विकास र समृद्धिमा सहयोग गर्न चीन तयार

काठमाण्डौ – नेपालका लागि चिनियाँ राजदूत झाङ माओमिङले नेपालको आर्थिक विकास र समृद्धिका लागि चीनले निरन्तर सहयोग गर्ने प्रतिबद्धता व्यक्त गर्नुभएको छ ।

काठमाण्डौमा हिजो सञ्चारमाध्यमका सम्पादकहरूसँग भएको छलफलमा राजदूत झाङले नेपाल चीनको घनिष्ठ छिमेकी र प्राथमिकतामा रहेको देश भएको बताउनुभयो । उहाँले स्वास्थ्य, शिक्षा, सडक पूर्वाधार, उद्योग, व्यापार र ऊर्जा क्षेत्रमा नेपाललाई सहयोग गर्दै आएको चीनले आउँदा दिनमा पनि प्राथमिकताका साथ सहयोग गर्ने स्पष्ट पार्नुभयो ।

भोटेकोशी नदीमा गएको बाढीबाट नेपालमा भएको जनधनको क्षति उल्लेख गर्दै उहाँले विपद्का बेला उद्धार, राहत, पुनःस्थापना र पुनर्निर्माणका साथै मानवीय सहयोगमा चीनले नेपालसँग सहकार्य गरेको स्मरण गर्नुभयो ।

राजदूत झाङले तातोपानी नाका आउँदो हप्तादेखि अस्थायी रूपमा सञ्चालन गर्ने तयारी भइरहेको जानकारी दिनुभयो । भौगोलिक अवस्थाका कारण नाका नियमित सञ्चालन गर्न कठिन रहेको उल्लेख गर्दै उहाँले वैकल्पिक व्यवस्था नहुँदासम्म हप्तामा एकदेखि दुई दिन सञ्चालन गर्ने तयारी भइरहेको बताउनुभयो ।

त्यस्तै, कोरला नाका जोड्ने सडकखण्डको जोमसोमसम्म कालोपत्र तथा स्तरोन्नतिको काम भइरहेको उहाँले जानकारी दिनुभयो । रसुवागढी नाका सञ्चालनका लागि नेपाल सरकारबाट औपचारिक प्रस्ताव प्राप्त भएपछि आवश्यक प्रक्रिया अघि बढाउने चीनको तयारी रहेको उहाँको भनाइ छ ।

नेपालमा राजनीतिक स्थिरता कायम हुनु, भ्रष्टाचार नियन्त्रण र सुशासनका पक्षमा सरकारले काम गर्नु विकास निर्माण तथा समृद्धिका लागि सकारात्मक वातावरण भएको राजदूत झाङले बताउनुभयो । उहाँले स्पष्ट कार्ययोजना र असल मनसायका साथ जनताको विश्वास जित्ने गरी काम गर्नुपर्नेमा जोड दिनुभयो ।

चीन–नेपाल सम्बन्धलाई थप सुदृढ बनाउन सरकार, राजनीतिक दल र जनस्तरको सम्बन्ध विस्तार आवश्यक रहेको उहाँले बताउनुभयो । 

प्रकाशित मिति:
थप अर्थ