आजदेखि देशभरको मौसममा सुधार

काठमाण्डौ – मौसम पूर्वानुमान महाशाखाले आजदेखि देशभरको मौसममा सुधार आउने जनाएको छ ।

गएको बुधबार, बिहीबार र शुक्रबार देशका धेरैजसो ठाउँमा हल्कादेखि मध्यम तथा थोरै ठाउँमा ठूलो पानी परेको थियो । हिजो शनिबार बिहानसम्म पनि काठमाण्डौ उपत्यकासहित केही ठाउँमा पानी परेकोमा दिउँसोपछि रोकिएको हो ।

पछिल्लो १२ घण्टामा एक/दुई ठाउँमा हल्का वर्षाबाहेक पानी परेको छैन । महाशाखाकाअनुसार हिजो बेलुका बझाङका एक/दुई ठाउँमा हल्का पानी परेको थियो ।

आज हिमाली र पहाडी क्षेत्रमा आंशिक बादल लाग्ने तथा तराईमा मौसम सफा रहने अनुमान छ ।

कोशी, बागमती र कर्णाली प्रदेशका हिमाली र पहाडी थोरै ठाउँ तथा गण्डकी, लुम्बिनी र सुदूरपश्चिम प्रदेशका हिमाली र पहाडी एक/दुई ठाउँमा मात्रै मध्यमसम्मको वर्षा हुन सक्ने महाशाखाले जनाएको छ ।