बेत्रावतीमा ‘एक्रो ब्रिज’ जडान भएपछि स्याफ्रुबेँसीसम्मै खुल्यो सडक

काठमाण्डौ – भोटेकोशी बाढीले राष्ट्रिय सडक सञ्जालबाट बाहिरिएको रसुवामा नेपाली सेनाले फलामे पुल जडान गरेसँगै सडक सञ्चालनमा आएको छ । पुल सञ्चालनमा आएसँगै रसुवा–नुवाकोट आवतजावत गर्ने गाडीले अप्ठ्यारा वैकल्पिक सडक प्रयोग गर्नुपर्ने बाध्यता हटेको छ ।

सेनाले निर्माण गरेको पुल हिजो गल्छी–रसुवागढी सडक आयोजनालाई हस्तान्तरण गरिएको हो । रसुवाको उत्तरगया नगरपालिका–५ र नुवाकोटको विदुर नगरपालिका–१० जोड्ने फलाकु खोलामा निर्मित नयाँ र पुराना पुल बाढीले बगाएपछि रसुवासँगको सडक सम्पर्क बिच्छेद भएको थियो ।

सडक विभागसँगको समन्वयमा सेनाले झण्डै ३०० मिटरको कठिन चट्टान हटाई पहुँच मार्ग विस्तार गरी बेत्रावतीसम्म सडक खुलाएको थियो । पुल बनेसँगै धादिङको गल्छी, नुवाकोटको देवीघाट, त्रिशूली र बेत्रावती तथा रसुवाको धुन्चे हुँदै स्याफ्रुबेँसीसम्म सडक सञ्चालनमा आएको छ ।