आरुघाटमा बेलिब्रिज जडानको तयारी

काठमाण्डौ – बूढीगण्डकी नदीमा आएको बाढीले गोरखाको आरुघाट र धादिङ जोड्ने मोटरेबल पुल बगाएपछि नेपाली सेनाले त्यहाँ बेलिब्रिज जडानको तयारी थालेको छ ।

बाढीका कारण पुलमा क्षति पुगेपछि प्रभावित क्षेत्रको आवागमनमा समस्या भएकाले यातायात सम्पर्क पुनःस्थापित गर्न सेनाको सैनिक इन्जिनियरिङ टोली परिचालन गरिएको हो । सैनिक जनसम्पर्क तथा सूचना निर्देशनालयका अनुसार बेलिब्रिज जडानका लागि आवश्यक तयारी अघि बढाइएको छ ।

बेलिब्रिज निर्माण भएपछि गोरखा र धादिङबीचको आवागमन सहज बनाउन सहयोग पुग्ने अपेक्षा छ । बाढीले पुल बगाएपछि स्थानीय बासिन्दा तथा यात्रुले आवतजावतमा कठिनाइ भोग्नुपरेको छ । तत्काल उद्धार तथा राहतका साथै क्षतिग्रस्त पूर्वाधारको पुनःस्थापना गरी प्रभावित क्षेत्रको जनजीवन सामान्य बनाउने प्रयास भइरहेको सेनाले जनाएको छ ।