नेभिगेशन
शनिबार, मंसिर ५, २०८३

परम्परा ताेड्दै ९५ वर्षीय वृद्धबाट पक्ली पुल उद्घाटन

काठमाण्डाै – विकास निर्माणका संरचना राजनीतिक नेता तथा जनप्रतिनिधिबाट उद्घाटन गराउने परम्परा तोड्दै लमजुङमा ९५ वर्षीय वृद्धबाट पक्की पुल उद्घाटन भएको छ ।

मध्यनेपाल नगरपालिका–१ र २ जोड्ने खहरे खोलामा निर्माण सम्पन्न भएको पक्की पुल स्थानीय ९५ वर्षीय गोरे सार्कीले रिबन काटेर उद्घाटन गर्नुभएकाे हाे ।

मध्यनेपाल नगरपालिका–१ का वडाध्यक्ष सुदीप थापाले पुल उद्घाटनका विषयमा विभिन्न पक्षबाट राजनीतिक दबाव र धम्कीसमेत आएको बताउनुभयाे । तर नागरिककाे करबाट निर्माण भएको संरचना नागरिककै हातबाट उद्घाटन हुनुपर्ने अडानबाट आफू पछि नहटेको उहाँको भनाइ छ ।

गण्डकी प्रदेश सरकारको भौतिक पूर्वाधार मन्त्रालयअन्तर्गत झन्डै ३ करोड ५० लाख रुपैयाँको लागतमा पुल निर्माण सम्पन्न भएको हो ।

राजनीतिक नेतृत्वबाट मात्रै विकास निर्माणका संरचना उद्घाटन गराउने प्रचलनबीच ज्येष्ठ नागरिकलाई दिइएको प्राथमिकतालाई स्थानीयवासीले सकारात्मक रूपमा लिएका छन् । यसले सार्वजनिक संरचनामा नागरिकको अपनत्व र ज्येष्ठ नागरिकप्रति सम्मानको सन्देश दिएको छ ।

– न्युज एजेन्सी नेपाल

प्रकाशित मिति:
थप समाज