नेभिगेशन
आइतबार, मंसिर ६, २०८३

मधेशका मुख्यमन्त्री यादवको पहिलो निर्णय : प्रदेशभर एकीकृत रोजगार कार्यक्रम सञ्चालन गर्ने

काठमाण्डाै – मधेश प्रदेशका नवनियुक्त मुख्यमन्त्री सरोजकुमार यादवले प्रदेशका आठ वटै जिल्लामा एकीकृत रोजगार कार्यक्रम सञ्चालन गर्ने निर्णय गर्नुभएको छ ।

आज कार्यभार सम्हाल्दै उहाँले प्रदेशमा विद्यमान गरिबी, बेरोजगारी र न्यून साक्षरताजस्ता समस्याको समाधानका लागि सीप विकास, रोजगारी सिर्जना तथा उद्यमशीलता प्रवर्द्धनका लागि कार्यक्रम सञ्चालन गर्ने पहिलो निर्णय गर्नुभएको हो ।

प्रस्तावित कार्यक्रमअन्तर्गत पुनः सीप विकास तथा सार्वजनिक रोजगार सेवा प्रवर्द्धन, मुख्यमन्त्री महिला स्वरोजगार कार्यक्रम, वैदेशिक रोजगारीबाट फर्किएका व्यक्तिका लागि स्वरोजगार कार्यक्रम र मुख्यमन्त्री रोजगार कार्यक्रम सञ्चालन गर्ने योजना अघि सारिएको निर्णयमा उल्लेख छ ।

त्यस्तै आधुनिक प्रविधिमा आधारित स्वरोजगार तथा आत्मनिर्भरता प्रवर्द्धनका लागि कृत्रिम बुद्धिमत्ता (एआई), ई–कमर्स र कम्प्युटरसम्बन्धी तालिममार्फत युवाको क्षमता तथा उद्यमशीलता विकास गर्ने लक्ष्यसहित प्रदेशका आठ वटै जिल्लामा एक महिनाभित्र कार्यक्रम प्रारम्भ गर्ने गरी प्रस्ताव गरेको निर्णयमा उल्लेख छ ।

बिहान प्रदेश प्रमुख डा. सुरेन्द्रलाभ कर्णबाट पद तथा गोपनीयताको शपथ ग्रहणपछि मुख्यमन्त्री यादवले आजै कार्यभार सम्हाल्नुभएको हो ।

सञ्चारकर्मीसँग कुरा गर्दै मुख्यमन्त्री यादवले सबै दलको सहमतिमा सरकार विस्तार गर्ने बताउनुभएको छ ।

प्रदेश प्रमुख कर्णले हिजो यादवलाई उपधारा ३ अनुसार सबैभन्दा ठूलो दलको नेताको हैसियतमा मुख्यमन्त्री नियुक्त गर्नुभएको थियो ।

आजको शपथ समारोहमा प्रदेशका ठूला दलहरू एमाले, कांग्रेस र नेकपाका शीर्ष नेताहरू अनुपस्थित रहेका थिए । १०२ सदस्यीय प्रदेशसभामा ३० दिनभित्र ५२ सांसदको विश्वासको मत जुटाउनु मुख्यमन्त्री यादवका लागि मुख्य चुनौती देखिएको छ ।

प्रकाशित मिति:
थप राजनीति