राप्रपाका संस्थापक अध्यक्ष एवम् पूर्व प्रधानमन्त्री सूर्य बहादुर थापाका छोरा सुनिलबहादुर थापा राप्रपा परित्याग गरी सहमहामन्त्री पदका साथ २०७७ साल साउन १३ गते कांग्रेसमा प्रवेश गर्नु भएको हो ।
धनकुटाको मुगा घर भएका थापा कांग्रेसको १४ औँ महाधिवेशनबाट केन्द्रीय सदस्यमा निर्वाचित हुनुभयो । उहाँ २०७० सालको संविधानसभा निर्वाचनमा धनकुटा जिल्ला क्षेत्र नम्बर २ बाट राष्ट्रिय प्रजातन्त्र पार्टीका तर्फबाट विजयी हुनु भएको थियो ।
२०७४ जेठमा बनेको शेरबहादुर देउवाको मन्त्रीमण्डलमा वाणिज्य तथा आपूर्ति मन्त्री बन्नु भएको थियो । २०७४ को संसदीय चुनावमा धनकुटा क्षेत्र नम्बर १ बाट भने उहाँ पराजित हुनु भएको थियो ।
उहाँले लामो समय संयुक्त राष्ट्रसंघ अन्तर्गत विभिन्न देशमा काम गर्नु भएको थियो । उहाँ सन् २०११ मा शरणार्थी सम्बन्धी राष्ट्रसंघीय उच्च आयोगको सुडानमा कार्यरत रहेका बेला राजीनामा गरी राजनीतिमा प्रवेश गर्नु भएको थियो ।
