किसान उपनामले परिचित पूर्व श्रम मन्त्री कृष्णकुमार श्रेष्ठको जन्म २०२४ साल पुस ७ गते तनहुँको साविकको जामुने –९ मा भएको हो । श्रेष्ठले प्रविणता प्रमाणपत्र तहसम्म अध्ययन गर्नुभएको छ । २०३८ सालमा अनेरास्ववियुको सदस्यता लिनुभएका श्रेष्ठले प्रजातन्त्र प्राप्तिको आन्दोलनमा जेलनेल पनि भोग्नुभयो ।
२०७० सालको दोस्रो संविधानसभा चुनावमा तनहुँ क्षेत्र नम्बर दुईबाट पराजित हुनुभएका श्रेष्ठले २०७४ को प्रतिनिधि सभा चुनावमा भने तनहुँबाट कांग्रेसका रामचन्द्र पौडेललाई हराउँदै विजयी हुनुभयो । एमाले पार्टी विभाजनपछि भने उहाँ नेकपा एकीकृत समाजवादीमा प्रवेश गर्नुभयो ।
पौडेललाई पराजित गर्नुभएका श्रेष्ठ गठबन्धनको सरकारमा कांग्रेसकै सभापति शेरबहादुर देउवाको क्याबिनेटमा श्रम तथा रोजगार मन्त्री बन्नुभयो । उहाँले संसदको उद्योग वाणिज्य आपूर्ति तथा उपभोक्ता हित संरक्षण समितिको सदस्य रही काम गरिसक्नुभएको छ । उहाँ नेपाल तेक्वान्दो संघको उपाध्यक्ष पनि रहिसक्नुभएको छ । उहाँ हार्डवेयर, यातायात, घरजग्गालगायतका व्यापार व्यवसायमा पनि संलग्न हुनुहुन्छ । तनहुँ घर भएका उहाँले बाराबाट उम्मेदवारी दिनुभएको छ ।
