एमाले पोलिटव्युरो सदस्य डा. राजन भट्टराईको जन्म २०२५ साल असार २९ गते सिन्धुपाल्चोकको सिन्धुकोटमा भएको हो । बाबु टंकनाथ भट्टराई र आमा मनुमायाबाट जन्मिएका उहाँ एक छोराका पिता हुनुहुन्छ ।
काठमाण्डौको चाबहिलस्थित पशुपति मित्र माविबाट अध्ययन सुरु गरेका डा. भट्टराईले एसएलसी भने पद्मोदय माविबाट पास गर्नुभएको हो । स्नातकसम्म नेपालमै अध्ययन गरेका उहाँले स्नातकोत्तर बेलायतबाट गर्नुभएको छ । उहाँले लण्डन युनिभर्सिटीको सेवास कलेजबाट स्नातकोत्तर गरेपछि भारतको जवाहरलाल नेहरु विश्वविद्यालयबाट विदेश नीतिमा विद्यावारिधी गर्नुभएको छ । 
एमालेभित्र बौद्घिक छवि बनाएका डा. भट्टराई स्थानीय रुपमा निकै लोकप्रिय मानिनुहुन्छ । डा. भट्टराई एसियाका विद्यार्थीहरुको समेत नेता बन्नुभएको थियो । उहाँ एशियन स्टुडेन्ट एशोसियशनको महासचिवमा विजयी भएर चारवर्ष हङकङमा बसेर विद्यार्थीहरुको राजनीतिमा सक्रिय रहनुभएको थियो । उहाँ नेपाल भारत प्रबुद्घ समूहको सदस्य समेत हुनुहुन्थ्यो । माधव नेपाल सरकारमा प्रधानमन्त्रीका विदेश मामिला सल्लाहकार भएका भट्टराई दोस्रो संविधानसभा चुनावमा समानुपातिकबाट सभासद हुनुभएको थियो । हाल उहाँ काठमाडौं स्थित चावहिल ७ मा बसोवास गर्दै आउनु भएको छ । उहाँ २०७४ सालको चुनावमा काठमाण्डौ क्षेत्र नम्बर ४ बाट उम्मेदवार बनेर पराजित हुनु भएको थियो ।