नेपाली कांग्रेसका महामन्त्री गगन थापाको जन्म वि.सं. २०३३ सालमा सोलुखुम्बुमा भएको हो । उहाँको बुवाको नाम महेन्द्रकुमार थापा र आमाको नाम रामेश्वरी थापा हो । काठमाण्डौको सिद्धार्थ वनस्थली हाइस्कुल पढेका थापाले समाजशास्त्रमा स्नातकोत्तर गर्नु भएको छ ।
थापाले वि.सं. २०४६ सालबाट राजनीति सुरु गर्नु भएको हो । उहाँ वि.सं. २०५९ देखि वि.सं. २०६१ सालसम्म नेपाली कांग्रेसको भातृ संगठन नेपाल विद्यार्थी संघको महामन्त्री हुनुहुन्थ्यो । तत्कालीन राजा ज्ञानेन्द्र शाहको सक्रिय शासन विरुद्धको आन्दोलनमा आक्रामक भाषण गरेर चर्चामा आएका नेता थापा आफ्नै पार्टीका शीर्ष नेताहरुका समेत आलोचक हुनुहुन्छ ।
उहाँ २०६४ सालमा भएको पहिलो संविधानसभा चुनावमा नेपाली कांग्रेसका तर्फबाट समानुपातिकबाट सभासद् हुनुभएको थियो । त्यस्तै २०७० सालमा भएको दोस्रो संविधानसभाको चुनावमा भने उहाँले कांग्रेसका तर्फबाट प्रत्यक्ष चुनावमा भाग लिनुभएको थियो । काठमाण्डौ क्षेत्र नम्बर ४ बाट चुनावमा प्रत्यक्ष प्रतिस्पर्धामा उत्रनु भएका थापा विजयी हुनुभएको थियो । २०७४ सालको चुनावमा यही क्षेत्रबाट उहाँले एमालेका राजन भट्टराईलाई हराउनु भएको थियो । उहाँ यस पटक पनि काठमाण्डौ क्षेत्र नम्बर ४ बाटै उम्मेदवार हुनुहुन्छ ।
दोस्रो संविधानसभाको चुनावबाट चुनिएपछि उहाँ २०७३ सालमा पुष्पकमल दाहल प्रचण्ड नेतृत्वको सरकारमा स्वास्थ्य मन्त्री भएर नौ महिना सरकारमा रहनुभयो । उहाँ सरकारमा रहँदा स्वास्थ्य क्षेत्रमा उल्लेख्य कामहरु भएका थिए ।
२०७८ सालमा भएको पार्टीको १४ औँ महाधिवेशनमा उहाँ महामन्त्रीका रुपमा विजयी हुनुभएको हो ।
