प्रकाश ज्वालाको जन्म वि.स.२०२३ मंसिर १२ गते सल्यानमा भएको हो । उहाँले एमए र बिएलसम्मको अध्ययन गर्नुभएको छ । नेकपा एकीकृत समाजवादी पार्टीका कर्णाली इन्चार्ज प्रकाश ज्वाला २०५६ सालको संसदीय चुनावमा सल्यानमा एमालेबाट विजयी घोषणा हुने पहिलो सांसद हुनुहुन्थ्यो । सल्यानबाट विजयी हुँदा माओवादी जनयुद्ध त्यस क्षेत्रमा फैलँदै थियो । तर पछि लामो समय जनप्रतिनिधि हुन नसकेका ज्वाला २०७४ सालको चुनावमा प्रदेशसभामा सल्यान १ ख बाट विजयी हुनुभयो । मुख्यमन्त्री बन्ने महत्वाकांक्षाका साथ प्रदेश सभामा प्रतिष्पर्धा गर्नुभएको थियो । प्रदेशको आर्थिक मामिला तथा योजना मन्त्री बन्नुभएका ज्वालाले कार्यवाहक मुख्यमन्त्रीको जिम्मेवारी भने पाउनुभएको थियो ।
उहाँले कर्णाली प्रदेशमा नेकपा एमालेविरुद्ध विद्रोह गर्नुभएको थियो । फ्लोर क्रस गरेर कर्णाली प्रदेश सरकार बचाइदिनुभयो । माओवादीबाट मुख्यमन्त्री बनेका महेन्द्रबहादुर शाही नेतृत्वको सरकार बचाइदिएसँगै ज्वाला एमालेबाट निष्काशनमा पर्नुभएको थियो ।
