काठमाण्डाै – चैत महिनामा झण्डै ५० हजार वटा घरजग्गा कारोबार भएका छन् । भूमि व्यवस्थापन तथा अभिलेख विभागको तथ्याङ्कअनुसार देशभरका मालपोत कार्यालयबाट चैत महिनामा ४९ हजार छ सय १२ वटा घरजग्गा किनबेच भएका हुन् ।

सुनसरीको इनरुवा मालपोत कार्यालयबाट सबैभन्दा धेरै दुई हजार ८२ वटा घरजग्गा किनबेच भएका छन् । यस्तै चैत महिनामा घरजग्गा काराेबारबाट साढे चार अर्ब ३१ करोड २३ लाख रुपैयाँ राजस्व सङ्कलन भएको छ । सबैभन्दा धेरै लगनखेल मालपोत कार्यालयले ४२ करोड ८६ लाख रुपैयाँ राजस्व सङ्कलन गरेको छ ।

चैतमा सेवाकरबापत ३१ करोड ५२ लाख रुपैयाँ, रजिस्ट्रेशन दस्तुरबापत दुई अर्ब ४९ करोड १७ लाख रुपैयाँ र पुँजीगत लाभकरबापत एक अर्ब ४६ करोड ९१ लाख रुपैयाँसहित अन्य विभिन्न सेवा प्रवाहबाट राजस्व सङ्कलन गरेको विभागले जनाएको छ ।

चैतमा ३८ हजार सात सय ४० वटा घरजग्गाको रोक्का र २९ हजार एक सय ५२ वटा घरजग्गाको फुकुवा भएको छ । साथै यस अवधिमा १७ वटा अपार्टमेन्टको लिखत पारित भएको विभागले जनाएको छ ।