काठमाण्डाै – अख्तियार दुरुपयोग अनुसन्धान आयोगले सुरक्षण मुद्रण केन्द्रका तत्कालीन कार्यकारी निर्देशक विकल पौडेलविरुद्ध विशेष अदालतमा भ्रष्टाचार मुद्दा दायर गरेको छ । अमेरिकी स्थायी आवासीय अनुमति पत्र लिएर नेपालको सार्वजनिक पदमा बसेको आरोपमा अख्तियारले पाैडेलविरुद्ध आज मुद्दा दायर गरेको हो ।

विदेशी अवासीय अनुमति पत्रधारीले नेपालको कुनै पनि सार्वजनिक पदमा रहन नपाउने कानुनी व्यवस्था रहेको छ । तर पौडेलले झुटा विवरण पेस गरेर सुरक्षण मुद्रण केन्द्रको कार्यकारी निर्देशक बनेको अख्तियारकाे आरोप पत्रमा उल्लेख छ । विकल पौडेलविरुद्ध सेक्युरिटी प्रिन्टिङको उपकरण खरिदमा भ्रष्टाचार अभियोगमा पनि मुद्दा विचाराधीन छ ।

यसैबीच अख्तियार दुरुपयोग अनुसन्धान आयोगले नेपाल टेलिकमका निलम्बित प्रबन्ध निर्देशक सुनील पौडेलविरुद्ध गैरकानुनी सम्पत्ति आर्जनको अभियोगमा पनि भ्रष्टाचार मुद्दा दायर गर्ने निर्णय गरेको छ ।

गएको असोजमा दायर भएको 'पेमेन्ट गेटवे' को मुद्दामा पाैडेललाई विशेष अदालतले अस्ति शुक्रवार मात्रै दोषी ठहर गरेको छ । याे मुद्दामा अदालतले आउँदो २५ गते फैसला सुनाउनेछ । आम्दानीको तुलनामा अस्वाभाविक आर्जन देखिएको भन्दै अख्तियारले अब अकुत सम्पत्ति कमाएको निष्कर्ष निकालेको हो ।