काठमाण्डौ – बझाङको प्रदेश सभा क्षेत्र नम्बर १ (क) को मतगणना अन्तिम चरणमा पुग्दा एमाले र कांग्रेसबीच रोचक प्रतिस्पर्धा कायमै छ । हिजो दिनभर एमालेले अग्रता लिएको यो क्षेत्रमा आज बिहानदेखि कांग्रेसले अग्रता लिएको थियो । अहिले फेरि एमालेले अग्रता लिएको छ ।

पछिल्लो मत परिणामअनुसार एमालेका दमनबहादुर भण्डारीले ३ सय ४२ मतले अग्रता लिइरहनुभएकाे छ । भण्डारीले ११ हजार १ सय ३ र कांग्रेसका अभिषेकबहादुर सिंहले १० हजार ७ सय ६१ मत ल्याउनुभएको छ । त्यस्तै माओवादीका जनकबहादुर बुढाले ३ हजार ७ सय ९७ र एकीकृत समाजवादीका दिलबहादुर सिंहले २ हजार ५ सय १० मत ल्याउनुभएको छ ।

अस्ति शनिवार भएको उपचुनावमा ३० हजारभन्दा धेरै मतदान भएकोमा अहिलेसम्म २८ हजारभन्दा धेरै मतगणना भइसकेको छ ।

२०७९ मा भएको चुनावमा यस क्षेत्रमा कांग्रेसका पृथ्वीबहादुर सिंहले १७ हजार १ सय १२ मत ल्याएर निर्वाचित हुनुभएको थियो । एमालेका अफिलाल ओखेडाले १३ हजार ३ सय ३६ मत ल्याउनुभएको थियो ।