काठमाण्डाै – काेशी प्रदेशले ललितपुर मेयर्स कप महिला टी–२० क्रिकेट प्रतियोगितामा पहिलाे जित हात पारेकाे छ । आज कीर्तिपुरकाे त्रिवि क्रिकेट मैदानमा भएकाे खेलमा काेशीले ललितपुर मेयर्स–एघार (११) लाई ६ विकेटले हरायो ।

ललितपुरले दिएको ८९ रनको लक्ष्य कोशीले १२ बलअघि ४ विकेट गुमाएर भेटायो । कोशीकी काजल श्रेष्ठले नट आउट ३६ रन बनाइन् । ललितपुरकी कृतिका मरासिनीले ३ विकेट लिइन् ।

यसअघि टस जितेर ब्याटिङ गरेको ललितपुरले २० ओभरमा ९ विकेट गुमाएर ८८ रन बनायो । ललितपुरकी आश्मा पुलामी मगरले नट आउट २६ रन बनाइन् । कोशीकी अप्सरी बेगमले ३ विकेट लिइन् ।

काेशीले लगातार तीन खेलकाे हारपछि पहिलाे जित हात पारेकाे हाे ।  योसँगै तालिकाको चौथो स्थानमा रहेको कोशीले ४ खेलमा २ अङ्क जोडेको छ । ललितपुर ४ खेलमा २ अङ्कसहित नेट रनरेटका आधारमा तेस्रो स्थानमा छ ।

पाँच टोली सहभागी प्रतियोगिताको फाइनल खेल आउँदो शनिवार हुनेछ । लिग चरणका शीर्ष दुई टोलीले उपाधिका लागि खेल्नेछन् ।