सुर्खेत - सुुर्खेतको वीरेन्द्रनगरमा टिप्परकाे ठक्करबाट एक जनाको ज्यान गएपछि आक्रोशित बनेका आफन्तहरुले वीरेन्द्रनगर बजार बन्द गरेका छन् । वीरेन्द्रनगर अहिले बजार तनावग्रस्त बनेको छ ।

 उनीहरुले टिप्पर चालकलाई कडा कारबाहीका साथै क्षतिपूर्तिको माग गर्दै आन्दोलन गरिरहेका छन् । आन्दोलनकारीले प्रहरी बिटमा समेत आगजनी गरेका छन् । प्रहरीले भीडलाई तितरवितर पार्न अश्रु ग्यास हाने पनि भीड नियन्त्रण गर्न सकेको छैन ।

आन्दोलनले उग्र रुप लिएपछि ६ बजेदेखि कर्फ्यु लगाउने तयारी गरेको छ । प्रमुख जिल्ला अधिकारी बसन्त अधिकारीले ६ बजेदेखि कर्फ्यु लगाउने जानकारी दिनुभयो । बिहान टिप्परले वीरेन्द्रनगरको जुम्ला रोडमा किच्दा कालिकोट महावै गाउँपालिका वडा नं ३ का २० वर्षीय केशर सिंहको ज्यान गएको हो । 

मृतक सिंह सवार भे १ प २१७८ नम्बरको मोटरसाईकललाई भे १ ख २२४२ नं को टिप्परले ठक्कर दिएको थियो ।