काठमाण्डौ – पूर्व श्रममन्त्री गोकर्ण विष्टले विभिन्न कारणले विदेशमा समस्यामा परेका नेपालीको तत्काल उद्धार गर्न सकारसँग माग गर्नुभएको छ ।

नेपालीको समस्याप्रति सरकार सम्वेदनशिल बन्नुपर्ने भन्दै विष्टले समस्यामा परेकालाई उद्धार गरी नेपाल ल्याउन, उद्धार नहुँदासम्म खान बस्नको व्यवस्था गर्न र सम्बन्धित देशलाई करार सम्झौताको पालना गराउन सरकारले ढिला नगरी कदम चाल्न आग्रह गर्नुभएको छ ।

कोरोना भाइरसका कारण विदेशमा खाशगरी स्वदेश फर्कने तयारी गरिरहेका, गैरकानुनी, आममाफीमा सहभागी भएका, भिसाको म्याद सकिएका र विभिन्न कारणले रोजगारी गुमाएकाहरु समस्यामा परेको भन्दै उनीहरुको तत्काल उद्धार र राहातका लागि सरकारले प्रभावकारी कदम चाल्नुपर्ने उहाँको भनाइ छ ।

कतिपय देशमा करार सम्झौताको एकपक्षीय रूपमा रद्द गरी अन्तर्राष्ट्रिय कानुनको उल्लंघन गर्ने र जबरजस्ती देश छाड्न आदेश गर्ने जस्ता अमानवीय घटनाहरू समेत देखा परेको भन्दै पूर्व श्रममन्त्री विष्टले यस विषयमा सम्वेदनशिल बन्नुपर्ने उल्लेख गर्नुभएको छ ।

‘परदेशमा रगत पसिना बगाएर मातृभूमिको सेवा गर्ने विभिन्न देशमा रहेका नेपालीहरू अलपत्र परेका छन्, उनीहरूले उद्धार र राहतको लागि सरकारको सहारा खोजिरहेका छन्,’ विष्टले भन्नुभएको छ ‘यस्तो अवस्थामा उनीहरूको उद्धार गरी नेपाल ल्याउन, स्वदेश नल्याउँदासम्म खानेबस्ने कुराको व्यवस्था सरकारले गर्नुपर्छ ।’

याे पनि पढ्नुहाेस्

मे ८ : खाडी र मलेसियामा काेराेना सङ्क्रमणकाे पछिल्लाे अपडेट

---