बर्दिया – कोरोना भाइरस सङ्क्रमण पुष्टि भएका दैलेख आठबीस नगरपालिका १ सात्तलाका युवालाई दैलेख सात्तला पुर्‍याएर फर्केको बसमा बर्दिया ठाकुरबाबा नगरपालिकाका नाै जना फर्किएकाे बताइएकाे छ । उनीहरु सबैकाे पहिचान भइसकेको छ ।

उनीहरु सबै ठाकुरबाबा नगरपालिका वडा नम्बर २, ३ र ५ का बासिन्दा हुन् । ठाकुरबाबा नगरपालिका वडा नम्बर २ कर्मलाका सात जना, वडा नम्बर ३ नेउलापुरका एक जना र वडा नम्बर ५ बनबिरपुरका एक जना रहेको ठाकुरबाबा नगरपालिकाले जनाएको छ । ठाकुरबाबा विपद् व्यवस्थापन समिति अन्तर्गत सङ्कट व्यवस्थापन केन्द्रको निर्णय अनुसार अहिले उनीहरुको घर रहेको कर्मला गाउँ, नेउलापुर गाउँको उत्तरजब्दा र बनबिरपुर गाउँमा आवत जावत निषेध गरिएको छ ।

दैलेखबाट घर फर्किएका सबैलाई सेल्फ क्वरेण्टीनमा बस्न लगाइएको छ । घरका सदस्यहरुलाई पनि सर्तकता अपनाउन भनिएको नगरपालिकाका प्रशासकीय अधिकृत रामहरि रिजालले जानकारी दिनुभयो ।

पीसीआर परीक्षणका लागि नाै जनाको स्वाब सङ्कलन गर्न स्वास्थ्य कार्यालय गुलरियामा अनुरोध गरिएको ठाकुरबाबा नगरपालिका स्वास्थ्य शाखाका प्रमुख इन्द्र राजवंशीले बताउनुभयो । दैलेखका ३९ जना युवा भारतको आगरा कञ्चनपुर बनबासा नाका हुँदै आएका थिए । सीमा नाकामा अलपत्र परेपछि दैलेखको आठबीस नगरपालिकाले उनीहरुलाई जेठ १ गते उद्धार गरी दैलेखको सात्तला पुर्‍याएकाे थियो । अहिले दैलेखमा काेराेना पुष्टि भएका युवा

दैलेख सात्तला पुर्‍याएर फर्कन लागेको बसमा बर्दिया ठाकुरबाबाका नाै जना घर आएका थिए । यतिबेला नगरपालिकामा पनि उच्च सर्तकता अपनाइएको छ । सङ्क्रमण फैलिन नदिन सतर्कता अपनाइएको ठाकुरबाबा नगरपालिकाका प्रमुख घननारायण श्रेष्ठले बताउनुभयो ।

यसैबीच इलाका प्रहरी कार्यालय भुरिगाउँले सङ्क्रमण फैलिन नदिन अर्को सूचना नआउँदासम्मका लागि कर्मला, बनबिरपुर र नेउलापुर उत्तर जब्दा गाउँ टोल सिल भएको सम्बन्धमा 'माइकिङ' गर्दै सूचना प्रवाह गरिरहेको छ ।