स्याङजा - आज थपिएका सङ्क्रमितमध्ये २ जनामा क्वरेन्टीनका सफाई कर्मचारी भएकाे खुलेकाे छ ।

गल्याङ नगरपालिका बहुमुखी क्याम्पसमा सरसफाई गर्ने २ जनामा कोरोना सङ्क्रमण पुष्टि भएको स्वास्थ्य कार्यालयले जनाएको छ ।

श्रीमान् श्रीमती नै सरसफाई गर्दै आएकोमा दुवैमा कोरोना सङ्क्रमण पुष्टि भएको स्वास्थ्य कार्यालय स्याङजाका प्रमुख यामप्रसाद शर्माले जानकारी दिनुभयो । उहाँले प्रदेशले निकालेको सूचीमा पुरुष मात्रै भनेको भए पनि नाम र उमेर भिडाउँदा प्रष्ट भएको जानकारी दिनुभयो ।

क्वरेन्टीनमा सरसफाई गर्दै आइरहेका उनीहरु बजारमा निरन्तर हिँडडुल गर्नुका साथै नगरपालिकाका कर्मचारीहरुसँग पनि सम्पर्कमा रहेको बताइएको छ । 
सरसफाई कर्मचारी धेरैको सम्पर्कमा रहेकाले अरुमा धेरैमा सङ्क्रमण फैरिएकाे हुनसक्ने भन्दै गल्याङका स्थानीयमा त्रास छाएको छ ।