कैलाली – सुदूरपश्चिममा आज ६४ जनामा कोरोना पुष्टि भएको छ । धनगढीको कोरोना परीक्षण प्रयोगशालामा थप ६४ जनामा कोरोना पुष्टि भएको सेती अस्पतालका सूचना अधिकारी दिलिपकुमार श्रेष्ठले बताउनुभयो ।

उहाँका अनुसार आज पुष्टि भएकामध्ये ५५ जना पुरुष र नौ जना महिला छन् । डडेल्धुराका २४ जना, कञ्चनपुरका २१ जना, कैलालीका ११ जना, बझाङका पाँच जना, डोटीका तीन जनामा कोरोना पुष्टि भएको हो । 

डडेल्धुरा नवदुर्गा गाउँपालिकाका २३ जनामा कोरोना पुष्टि भएको छ भने अमरगढी नगरपालिकाका एक जनामा कोरोना पुष्टि भएको छ । कैलालीको चुरे गाउँपालिकाका पाँच जना, धनगढी उपमहानगरपालिकाका दुई जना, गोदावरी नगरपालिकाका दुई जना, लम्कीचुहा नगरपालिकाका एक जना र टीकापुर नगरपालिकाका एक जनामा कोरोना पुष्टि भएको छ । 

बझाङको बिथ्थडचिर र केदारस्यू गाउँपालिकाका दुई/दुई जना तथा खप्तड छान्नाका एक जनामा कोरोना पुष्टि भएको छ । डोटीको जोरायल गाउँपालिकाका दुई जना र सायल गाउँपालिकाका एक जनामा कोरोना सङ्क्रमण देखिएको छ । 

कञ्चनपुरको लालझाडीका १४ जना, महाकाली नगरपालिकाका तीन जना, पुनर्वावास नगरपालिकाका दुई जना, बेदकोट नगपालिकाका एक जना र कञ्चनपुरकै तर पालिका नखुलेका थप एक जनामा कोरोना पुष्टि भएको हो । 

योसँगै सुदूरपश्चिममा सङ्क्रमितको सङ्ख्या दुई सय ५५ पुगेको छ । अहिलेसम्म सबैभन्दा बढी कैलालीमा ७८ जना, कञ्चनपुरमा ५५, डडेल्धुरामा ३९, बाजुरामा २१, अछाममा १६, डोटीमा १३, बझाङमा १४, दार्चुलामा १२ र बैतडीमा ६ जनामा कोरोना पुष्टि भएको छ । 

पुष्टि भएका दुई जनाको मृत्यु भइसकेको छ भने २१ जना निको भएर घर फर्किसकेका छन् । अहिलेसम्म धनगढीको प्रयोगशालाबाट दुई सय २७, सुर्खेतको प्रयोगशालाबाट १२, राष्ट्रिय जनस्वास्थ्य प्रयोगशालाबाट ५ र दाङको प्रयोगशालाबाट एक जनामा कोरोना पुष्टि भएको छ ।