कैलाली – सुदूरपश्चिम प्रदेशमा आज ६८ जनामा कोरोना सङ्क्रमण पुष्टि भएको छ । धनगढीको कोरोना परीक्षण प्रयोगशालामा थप ६८ जनामा कोरोना पुष्टि भएको हो । २४ घण्टामा सुदूरपश्चिममा थपिएको यो सङ्ख्या अहिलेसम्मकै धेरै हो ।

तीन जना महिला र ६५ जना पुरुषमा सङ्क्रमण पुष्टि भएको सेती प्रादेशिक अस्पतालका सूचना अधिकारी दिलिपकुमार श्रेष्ठले बताउनुभयो । उहाँका अनुसार बैतडीका २१, डोटीका २०, कैलालीका १३, कञ्चनपुरका ११ र अछामका तीन जनामा कोरोना पुष्टि भएको हो । 

योसँगै सुदूरपश्चिममा सङ्क्रमितको सङ्ख्या तीन सय ३२ पुगेको छ । अहिलेसम्म सबैभन्दा बढी कैलालीका ९३ जना, कञ्चनपुरका ६६, डडेल्धुराका ३९, डोटीका ३७, बैतडीका २७, अछामका २२, बाजुराका २१, बझाङका १४ र दार्चुलाका १२ जनामा कोरोना पुष्टि भएको छ । 

काेराेना पुष्टि भएकामध्ये दुई जनाको ज्यान गइसकेको छ भने २६ जना निको भएर घर फर्किसकेका छन् । अहिलेसम्म धनगढीको प्रयोगशालाबाट तीन सय चार, सुर्खेतको प्रयोगशालाबाट १२, राष्ट्रिय जनस्वास्थ्य प्रयोगशालाबाट पाँच र दाङको प्रयोगशालाबाट एक जनामा कोरोना पुष्टि भएको छ ।