सिन्धुपाल्चोक – जिल्ला समन्वय समिति सिन्धुपाल्चोकले जलवायु परिवर्तन र असरका विषयमा यस वर्ष पनि जलवायु दिवस मनाएको छ । मेलम्ची नगरपालिका ९ गुफाडाँडामा दोस्रो जलवायु दिवस तथा अन्तर्क्रिया कार्यक्रम आयोजना गरेको हो । पर्यटकीयस्थल गुफाडाँडामा सन् २०२० देखि जलवायु सम्मेलन हुंदै आएको हो । 

सिन्धुपाल्चोक जलवायु तथा वातावरणीय जोखिमको हिसाबले अगाडि भएकाले पनि सिन्धुपाल्चोकले यो विषयको उठान गरिरहेको छ । सिन्धुपाल्चोकमा बर्सेनि बाढी पहिरोबाट क्षति हुने गरेको छ । 

यस वर्ष ७८ वटा झण्डात्तोलन गर्दै जलवायु परिवर्तन एवम् कोभिड–१९ सम्बन्धी सन्देशमूलक ब्यानर प्रदर्शन, जलवायु परिवर्तनसम्बन्धी अन्तरक्रिया गर्दै जलवायु दिवस मनाइएको छ । 

जलवायु सम्मेलनका क्रममा २०७५ सालमा राष्ट्रपति विद्यादेवी भण्डारीले गुफाडाँडामा राष्ट्रिय जलवायु सम्मेलनको उद्घाटन गर्नुभएको थियो । यस वर्ष कोभिडका कारण सीमित व्यक्तिको मात्र उपस्थिति भएको हो । 

यस वर्ष १० बुँदे गुफाडाँडा घोषणापत्र जारी गर्दै सम्मेलन सकिएको छ ।