अदालतले कसैकाे जुलुस हेरेर हाेइन संविधान हेरेर फैसला गर्छ भन्नेमा विश्वास छ : रघुजी पन्त

 फागुन १०, २०७७ सोमबार १९:२७:३ | उज्यालो सहकर्मी
unn.prixa.net

काठमाण्डाै – नेपाल कम्युनिस्ट पार्टी (नेकपा) काे प्रचण्ड–माधव समूहका स्थायी कमिटी सदस्य रघुजी पन्तले प्रतिनिधि सभा विघटनको कदम सर्वोच्च अदालतबाट सच्चिनुपर्ने बताउनुभएको छ ।

नेपाल दलित मुक्ति सङ्गठनले प्रतिनिधि सभा विघटनको विरोधमा सोमबार काठमाण्डाैमा आयोजना गरेको विरोध र्‍यालीमा सञ्चारकर्मीहरूसँग कुरा गर्दै नेता पन्तले असंवैधानिक रूपमा भएको प्रतिनिधि सभा विघटन सर्वोच्च अदालतको फैसलाद्वारा सच्चिन सम्भव भएको बताउनुभएको हो । सर्वोच्च अदालतले कसैको जुलुस हेरेर नभइ नेपालको संविधान हेरेर फैसला गरी प्रतिनिधि सभा पुनर्स्थापना गर्नेमा विश्वास रहेको बताउनुभयो ।

नागरिकलाई जागरुक बनाउन र प्रतिनिधि सभा पुनर्स्थापनाको पक्षमा जनमत बनाउन निरन्तर विरोध प्रदर्शन भइरहेको र सर्वोच्चको फैसला नआउञ्जेलसम्मलाई विरोधको कार्यक्रम जारी रहने पनि पन्तकाे भनाइ छ ।  

माइतीघर मण्डलादेखि बानेश्वरसम्म भएको र्‍यालीमा प्रदर्शनकारीहरूले प्रतिनिधि सभा पुनर्स्थापनाको माग गर्दै नाराबाजीसमेत गरेका थिए । नेपाल दलित मुक्ति सङ्गठन केन्द्रीय सङ्घर्ष समितिका संयोजक दलजित श्रीपाइलीले प्रतिनिधि सभा विघटन गरी प्रधानमन्त्री ओलीले देशमा अस्थिरता पैदा गरेको बताउनुभयो ।

संविधान, गणतन्त्र, सङ्घीयता, धर्म निरपेक्षतामाथि 'कू' भएको भन्दै संयोजक श्रीपाइलीले संविधानमा भएका दलितका अधिकारहरूसमेत खोसिएको अनुभूति भएकाले प्रतिनिधि सभा पुनर्स्थापनाकाे पक्षमा आन्दोलन गर्नुपरेको बताउनुभयो ।  

अन्तिम अपडेट: फागुन ११, २०७७

तपाईको प्रतिक्रिया