म्याग्दी – मङ्गलवार राति परेको पानीसँगै आएको बाढी र पहिरोका कारण म्याग्दीको मंगला गाउँपालिका ५ अर्मन छिस्बाङमा ६ घर विस्थापित भएका छन् । बस्ती नजिकै खहरे खोलामा आएको बाढीले ६ घर परिवार विस्थापित भएका जिल्ला प्रहरी कार्यालयले जनाएको छ ।

यसैगरी मालिका गाँउपालिका–६ दुखुमा पनि वर्षाकै कारण एक घर परिवार विस्थापित भएका जिल्ला प्रहरी कार्यालय म्याग्दीका प्रहरी निरीक्षक (इन्स्पेक्टर) वीरेन्द्रराज गुरुङले जानकारी दिनुभयो । छिस्बाङ र दुखुमा गरी सात घर परिवारका २६ जनालाई सुरक्षित ठाउँमा स्थानान्तरण गरिएको छ ।

यस्तै बाढी र पहिरोका कारण बन्द भएको म्याग्दी र मुस्ताङलाई जोड्ने राष्ट्रिय राजमार्ग बेनी–जोमसोम–कोरला सडक खण्ड अहिले सञ्चालनमा आएको छ । सडकभन्दा माथिबाट खसेको पहिरोले पुर्‍याएकाे अवरोधलाई हटाएपछि सडक सञ्चालनमा आएको प्रहरी निरीक्षक गुरुङले बताउनुभयो । बाढी र पहिरोले रघुगंगा गाउँपालिका–३, गलेश्वर, चमेरे, रघुगंगा–१, बेगखोला र अन्नपूर्ण–३, दानाको रुप्से खोलामा सडक बन्द भएको थियो । 

पश्चिम म्याग्दीको मंगला, मालिका र धवलागिरि गाउँपालिका जोड्ने बेनी–दरबाङ सडक खण्ड पनि फेरि सञ्चालनमा आएको छ । 

यस्तै बाढी पहिरोका कारण बन्द बेनी–पोखरा मध्यपहाडी लोकमार्ग अन्तर्गत पर्वतको कुश्मा नगरपालिका ८ सुन्दरे खोलाको सडक खण्ड पनि बुधवार दिउँसोदेखि खुलेको छ । सडक निर्माणको जिम्मा लिएको लामा कन्ट्रक्शनको हेभी इक्विपमेन्ट प्रयोग गरेर सडक खुलाइएको पर्वतका प्रमुख जिल्ला अधिकारी देवी पाण्डे खत्रीले बताउनुभयो । 

पश्चिम म्याग्दीको मंगला गाउँपालिका–५ अर्मनको छिस्बाङ खहरे खोलामा आएको पहिरोले घर बगाउँदा दुई जनाको ज्यान गएको छ ।