सोलुखुम्बु - सोलुखुम्बुको सदरमुकाम सल्लेरीसहितका क्षेत्रमा भारी हिमपात भइरहेको छ ।  सल्लेरीलगायत अन्य क्षेत्रमा गएरातिदेखि नै भारी हिमपात भइरहेको छ । 

सडकमा बाक्लो हिउँ जमेका कारण गाडी चल्न सकेका छैन भने काठमाण्डौ लगायत बाहिरी जिल्लामा जाने गाडी चल्न नसकेको यातायात व्यवसायी दोर्जी शेर्पाले बताउनुभयो । 

सडक मार्गबाट सोलुखुम्बु भित्रिने एक मात्र नाका पत्ताले क्षेत्रको सडकमा करिब २ फिट जति हिउँ जमेकाले तत्काल गाडी चल्ने सम्भावना कम रहेको शेर्पाले बताउनुभयाे । 

हिमपातपछि सदरमुकाम सल्लेरी, फाप्लु, नयाँ बजार लगायतका क्षेत्रमा हिउँ खेल्न मनिसहरु सडकमा निस्कन थालेका छन् भने हिउँ पर्ने क्रम झनै बाक्लिँदै गएको स्थानीय रमेश राइले बताउनुभयो । खुम्बु क्षेत्रमा करिब ११/१२ दिनयता दैनिकजसो नै हिमपात भइरहेको छ भने गएरातिदेखि सुरु भएको भारी हिमपातले जनजीवन प्रभावित भएकाे छ । 

यस क्षेत्रमा बाक्लो हिउँ जमेका कारण मानिसहरू घर बाहिर निस्कन समेत मुस्किल भइरहेको  सगरमाथा राष्ट्रिय निकुञ्ज नाम्चेका प्रमुख भूमिराज उपाध्यायले जानकारी दिनुभयो ।