सोलुखुम्बु - सोलुखुम्बुको लुक्लामा हवाई सेवा लिने यात्रुको सङ्ख्या ५३ प्रतिशतभन्दा धेरैले बढेको छ । सन् २०२० को तुलनामा २०२१ मा हवाई सेवा लिने यात्रुको सङ्ख्या ५३ दशमलव १६ प्रतिशतले बढेको हो ।

नागरिक उड्ययन प्राधिकरण लुक्लाको तथ्याङ्क अनुसार सन् २०२० मा ५ हजार २ सय ७० पटक उडान तथा अवतरण भएकोमा २१ हजार ३ सय ९ जना यात्रुले विमान सेवा लिएका थिए । तर सन् २०२१ मा १० हजार ६ सय १५ पटक उडान तथा अवतरण भएकोमा ४० हजार ८७ जना यात्रुले सेवा लिएका छन्।

सन् २०२१ मा  १७ हजार २ सय २९ जना यात्रु खुम्बु भित्रिएको र २२ हजार ८ सय ५८ जना बाहिरिएको तथ्याङ्क छ । जाडोमा मौसममा चिसो छल्न खुम्बुका स्थानीयबासिन्दा अन्त जाने भएका कारण भित्रिने भन्दा बाहिरिनेको सङ्ख्या बढी देखिएको कार्यालयले जनाएको छ ।

सन् २०२० मा कोरोना महामारीका कारण खुम्बुमा पर्यटकीय गतिविधि ठप्प हुँदा विमान सेवा लिनेको सङ्ख्या कम थियो । अघिल्लो सिजनमा केही सुधार भएकाले विमानसेवा लिनेको यात्रुको सङ्ख्या बढेको प्राधिकरणका कर्मचारी विक्रम सिंह बस्नेतले बताउनुभयो ।