साेलुखुम्बु – सगरमाथा राष्ट्रिय निकुञ्ज नाम्चेले हेलिकप्टरहरुले राजस्व तिर्न बाँकी रहेको विषयमा छानबिन गर्न पाँच सदस्यीय समिति गठन गरेको छ । निकुञ्ज क्षेत्रमा उडान गर्ने हेलिकप्टरहरूले तोकिएको राजस्व छल्ने क्रम बढेसँगै निकुञ्जले छानबिन समिति गठन गरेको हो । कार्यालयले सहायक संरक्षण अधिकृत मनोजकुमार मण्डलको संयाेजकत्वमा पाँच सदस्यीय टोली गठन गरेको प्रमुख संरक्षण अधिकृत भूमिराज उपाध्यायले जानकारी दिनुभयो ।

उहाँका अनुसार समितिको सदस्यहरूमा चौरीखर्क रेन्जपोस्टका रेन्जर श्यामप्रकाश तामाङ र खुम्जुङ रेन्जपोस्टका रेन्जर खिमराज वली तथा जोरसल्ले पोस्टका सिनियर गेमस्काउट एसना राई र चौरीखर्क रेन्जपोस्टका गेमस्काउट भूपबहादुर थापा रहेका छन् । गठित समितिले यही फागुन १३ गतेभित्रमा अध्ययन र छानबिन गरी कार्यालयलाई प्रतिवेदन पेस गर्ने निकुञ्जले जनाएको छ ।

राजस्व असुल गर्न बाँकी रहेका हेलिकप्टर कम्पनीहरूको सूची तयार गर्ने, उनीहरूलाई टेलिफोन गरी ताकेता गर्ने लगायतका काम समितिको जिम्मेवारीमा पर्ने प्रमुख संरक्षण अधिकृत उपाध्यायले बताउनुभयो । राष्ट्रिय निकुञ्जलाई हेलिकप्टर कम्पनीहरूले एक करोड रुपैयाँभन्दा बढी राजस्व तिर्न बाँकी रहेको कार्यालयले जनाएको छ ।

सगरमाथा राष्ट्रिय निकुञ्जले आफ्नो कार्यक्षेत्रमा उडान गर्ने हेलिकप्टरलाई प्रति पटक तीन हजार रुपैयाँ र नेपाली पाइलटलाई एक सय रुपैयाँ, सार्क देशका पाइलटलाई एक हजार पाँच सय तथा अन्य देशकालाई तीन हजार रुपैयाँ शुल्क लिने गरेको छ । निकुञ्जले यसअघि हेलिकप्टर अवतरण शुल्क मात्रै लिँदै आएको भए पनि गएकाे वैशाख २८ गतेदेखि पाइलटबाट पनि शुल्क लिन थालेको निकुञ्जको कार्यालय नाम्चे सोलुखुम्बुले जनाएको छ ।