सोलुखुम्बु - सोलुखुम्बुको तेन्जिङ हिल्लारी विमानस्थल लुक्ला नजिकैको वनमा लागेको आगाे फेरि फैलिन सुरु भएको छ ।

गएराति  आफैँ नियन्त्रणमा आएको आगाे हावाका कारण अहिले फेरि फैलिन सुरु भएको नागरिक उड्ययन प्राधिकरण लुक्लाका प्रमुख द्वारीका अछामीले जानकारी दिनुभयो ।

उहाँका अनुसार खुम्बु पासाङ ल्हामु गाउँपालिका-२ नाक्चुङमा रहेकाे हरियाली सामुदायिक वनमा आइतवार बेलुकादेखि सुरु भएको डढेलो शीतका कारण सोमवार राति आफैँ नियन्त्रणमा आएको थियो ।

तीव्र गतिको हावाको वेगका कारण स्थानीयवासी, प्रहरीसहित फायर फाइटिङ हेलिकप्टरले निभाउन नसकेको आगोे राति शीतका कारण आफैँ नियन्त्रणमा आएको थियो । तर हावा लाग्न सुरु भएसँगै नाकचुङ गाउँबाट पुनः आगो फैलिन सुरु भएको स्थानीयले बताएका छन् ।

आगो तीव्र गतिमा फैलिँदा धुवाँका कारण सोमवार बिहान झण्डै १ घण्टा विमानस्थल नै बन्द गर्नुपरेकोे थियो । आगोका कारण सल्ला, उत्तिसलगायतका प्रजातिका बोटबिरुवाहरु नष्ट भएको स्थानीयले बताएका छन् । आगलागीको कारण पत्ता लाग्न सकेको छैन ।