दाङ -  कालाेपत्र भएको तीन वर्ष नपुग्दै शहीद मार्ग अन्तर्गतको दाङको घोराहीदेखि रोल्पाको होलेरीसम्मको सडक बिग्रिएर अस्तव्यस्त भएको छ ।

कालाेपत्र गरिएको सडकमै ठूलाठूला खाडल बनेका छन् भने प्रायजसाे ठाउँमा कालाेपत्र नै देखिँदैन । ओभरलोड भार बोकेका टिपरकै कारण सडक छियाछिया भएको स्थानीयहरुको गुनासो छ।

दाङबाट रोल्पा महत हुँदै कर्णाली प्रदेशको डोल्पा पुग्ने शहीद मार्ग जनयुद्धको समयमा माओवादीले श्रम शिविरमार्फत निर्माण सुरु गरेको सडक हो । माओवादी सरकारमा गएसँगै सडक विस्तार र कालाेपत्रको योजना अगाडि बढेको थियो ।

२०७५ सालमा कालाेपत्र सकिएको एक वर्ष नपुग्दै यो सडकको घोराही होलेरी खण्डमा कालाेपत्र उप्किएर खाडल बन्न थालेको  थियाे । जसकाे मारमा घोराही उपमहानगरको बगालेदेखि रोल्पाको होलेरीसम्मका स्थानीय र यस सडकमा यात्रा गर्नेहरु परेका छन् ।

एक्जीम बैंक अफ इन्डियाको सहयोगमा ४० करोड रुपैयाँको लागतमा ३१ किलोमिटर सडक कालाेपत्र गरिएको हो। सडकको भारवहन क्षमताभन्दा धेरै क्षमताका गाडी चल्नु र निर्माण व्यवसायीले कमसल खालको निर्माण सामग्री प्रयोग गर्दा कालो पत्रे एक वर्ष नपुग्दै उप्किन थालेकाे स्थानीयकाे गुनासाे छ। 

यो सडकमा दैनिक रुपमा दाङमा रहेका दुई वटा सिमेन्ट उद्योगका लागि चुनढुङ्गा बोक्ने दुई सयभन्दा बढी टिपरहरु गुड्ने गरेका छन् ।