बारा - बाराको चार वटा मतदान केन्द्रमा मतदान भइरहेकाे छ। पचरौता नगरपालिकाको चार वटा मतदान केन्द्रमा आज मतदान भइरहेको छ ।

पचरौता नगरपालिका वडा नम्बर–२ र वडा नम्बर–४ मा बिहान सात बजेदेखि मतदान सुरु भएको निर्वाचन अधिकृत नीरबहादुर दाहालले जानकारी गराउनु भयो ।

वडा नम्बर–२ को बरगाछी र श्री नगरबैरिया प्रावि मतदान केन्द्र तथा वडा नम्बर–४ को बेल्दारीमा रहेकाे नेरा प्राविको 'क' र 'ख' मतदान केन्द्रमा आज मतदान भइरहेको निर्वाचन अधिकृत दाहालले जानकारी गराउनु भयो। यो चारवटै मतदान केन्द्रमा  वैशाख ३० मा भएको मतदान रद्द भएको थियो।

मतदान भइरहेको क्षेत्रमा सुरक्षा व्यवस्था कडा पारिएको प्रमुख जिल्ला अधिकारी कृष्णबहादुर कटुवालले जानकारी गराउनु भयो । प्रत्येक मतदान केन्द्रमा प्रहरी नायब उपरीक्षकको नेतृत्वमा ठूलो सङ्ख्यामा नेपाल प्रहरी र सशस्त्र प्रहरी परिचालन गरिएको निर्वाचन अधिकृत दाहालले जानकारी गराउनु भयो।

मतदान केन्द्रको बाहिरी घेरामा नेपाली सेना परिचालन गरिएको छ । चार वटा मतदान केन्द्रमा दुई हजार नौ सय ८६ मतदाता रहेकोे निर्वाचन अधिकृत दाहालले जानकारी गराउनु भयो।