दाङ, जेठ ४ । दाङको घोराही उपमहानगरपालिकामा गठबन्धनका उमेदवारलाई पछि पार्दै एमालेका मेयर पदका उमेदवार नरुलाल चौधरीले आफ्नो अग्रता फराकिलो बनाउँदै लैजानु भएको छ ।

६५ हजार ५ सय २५ मतगणना अनुसार मेयरमा एमालेका उमेदवार नरुलाल चौधरीले २६ हजार ७ सय ६३ मत ल्याउनु भएको छ । गठबन्धनका तर्फबाट माओवादी केन्द्रका हेमराज शर्माले २१ हजार ८ सय १३ मत प्राप्त गर्नुभएको छ । चौधरी र शर्माबीच ४ हजार ९ सय ५० मतान्तर रहेको छ ।

यसैगरी उपप्रमुखमा पनि एमालेको अग्रता रहेको छ । एमालेका हुमा डिसीले २५ हजार ६ सय ६१ मत प्राप्त गर्दा उहाँका प्रतिस्पर्धी कांग्रेसका भुप बहादुर डाँगीले २४ हजार ९ सय ८७ मत प्राप्त गर्नुभएको छ । डाँगी र डिसीबीच ६ सय ७४ को मतान्तर रहेको छ । घोराही उपमहानगरपालिकामा ७६ हजार ५ सय २१ मत खसेको थियो । अब १० हजार ९ सय ९६ मत गणना हुन बाँकी रहेको छ ।