चितवन – भरतपुर महानगरपालिकामा ३१ हजार पाँच सय २८ मत गन्न बाँकी रहेको छ । अहिलेसम्म यस पालिकामा ९६ हजार तीन सय ११ मत गनेर सकिएको मुख्य निर्वाचन अधिकृतको कार्यालयले जनाएको छ । कार्यालयका अनुसार महानगरको १ देखि २० नम्बरसम्मको गणना सकिएको छ ।

अहिलेसम्मको गणनाअनुसार महानगरपालिकाको मेयरमा पाँच दलीय गठबन्धनमा नेकपा (माओवादी केन्द्र) बाट उम्मेदवार बन्नुभएकी रेनु दाहालले आठ हजार दुई सय ९५ मतले अग्रता लिनुभएको छ । दाहालले ३७ हजार नाै सय २८ मत प्राप्त गर्दा नेकपा (एमाले) का विजय सुवेदीले २९ हजार ६ सय ३३ मत प्राप्त गर्नुभएकाे छ । स्वतन्त्र उम्मेदवार जगन्नाथ पौडेलले १२ हजार चार सय ६३ मत प्राप्त गर्नुभएको छ ।  

उपमेयरमा गठबन्धनबाटै नेपाली कांग्रेसका चित्रसेन अधिकारीले राप्रपाकी हिमला गुरुङलाई १६ हजार ६ सय ७८ मत अन्तरले अग्रता लिनुभएको छ । अधिकारीले ४० हजार एक सय २१ मत प्राप्त गर्दा गुरुङले २३ हजार चार सय ४३ मत प्राप्त गर्नुभएको छ । 

भरतपुर महानगरमा अहिले वडा नम्बर २१ र २२ को मतगणना भइरहेकाे छ । यस पालिकामा २९ वटा वडा रहेका छन् । पालिका चुनावमा यहाँ एक लाख २७ हजार आठ सय ३९ मत खसेको थियो ।