दाङ – दाङको देउखुरी भएर बग्ने दरबाजा खोलामा फसेका महिलाहरुलाई प्रहरीले उद्धार गरेको छ । १६/१७ जनाको समूह भएर त्रीशक्ति सामुदायिक वन क्षेत्रमा च्याउ खोज्न गएका बेला खोलामा बाढी आउँदा उनीहरु फसेका थिए । 

मानिस खोलामा फसेको सूचना पाए लगत्तै रणसिंह दल गण लमही ब्यारेकका क्याप्टेन जलमदेव चौधरी, नं २९ ज्वालामाई गण हेड क्वाटर भालुवाङका प्रहरी निरीक्षक, र सशस्त्र प्रहरी वल नं ४१ गण हेक्वा अर्जुन खोलाका प्रहरी निरीक्षक रबिन्द्र कार्की, वडा प्रहरी कार्यालय लमहीका प्रहरी निरीक्षक पुष्पराज थापा, ईलाका प्रहरी कार्यालय गढवाका प्रहरी निरीक्षक रन्जु केसी लगायतको टोली घटनास्थलमा पुगेको थियो ।

राजपुर बेला गाउँपालिका वडा नम्बर २ बेला चप्फाका स्थानीय महिलाहरु च्याउ खोज्न जंगल गएर फर्किने समयमा रसरी र माररी खोला मिलेर बनेको सोमैथान नजिक रहेको दरबाजा खोलामा सत्र जना फसेका हुन् । रातिदेखि पानी परिरहेको थियो । च्याउ उम्रेका होलान भन्ने लागेर खोज्न नजिकैको जंगलमा गएकाहरु खहरे खोलामा फसेको अन्जना विकले बताउनुभयो । खोलाको दुरी लामो भएको, पानी परिरहेको र खोला पार गरिहालिन्छ भनेर खोलामा पसेकोमा एक्कासि भेल आएपछि खोलामा फसेको अन्जनाले बताउनु भयो । उनीहरु बिहान ९ बजेदेखि खोलामा फासेका थिए ।