काठमाण्डाै - देश विकासमा राजनीतिक दलहरुले चासो नदिँदा आमनागरिक असन्तुष्ट देखिएको प्रमाण यसपालिको चुनावले पुष्टि गरिसकेको छ । ठूला मानिएका राजनीतिक दलहरुका अगाडि नयाँ शक्तिहरुको उदय भएको छ ।

नागरिकले विकास चाहेका छन् त्यो पनि तीव्र गतिमा । तर राजनीतिक दल र देशको नेतृत्व जनचाहनाअनुसार अब्बल साबित हुन सकिरहेको छैन । अबको नेतृत्वले देश विकास गर्नेमा नागरिक आशावादी छन् । तर चुनावबाट जनप्रतिनिधि चुनिएर आइसक्दासमेत काठमाण्डौ उपत्यकाको अवस्था भने चुनावअघिको भन्दा फरक देखिँदैन । 

जताततै अस्तव्यस्त देखिन्छ । भएका संरचना भत्काइएका छन् तर त्यसको व्यवस्थापन भएको छैन । विकास निर्माणका लागि पहलकदमी थाल्नु उचित त हो तर उचित व्यवस्थापन विनाको विकास निर्माण दिगो हुन सक्दैन । त्यसैले पनि नागरिकले चाहेको व्यवस्थापनसहितको विकास निर्माणको खाँचो देखिन्छ ।

मर्मतसम्भारका लागि सुरु गरिएका ठाउँहरुमा त्यत्तिकै अस्तव्यस्त छ भने काम गर्नुपर्ने ठाउँमा समेत प्रतिनिधिहरुको खासै चासो देखिँदैन । न त राम्रोसँग फोहर व्यवस्थापन भएको छ, न त सडकका खाल्डाखुल्डी नै पुरिन थालेका छन्। न पार्किङको बन्दोबस्त छ, न त सरसफाइको काम भएको छ । 

आजको फोटो फिचरमा न्युज एजेन्सी नेपालका फोटो पत्रकारले कैद गरेका अस्तव्यस्त काठमाण्डाैका यी तस्बिरहरु।