आजदेखि हलमा ‘प्रेमा’

 चैत १७, २०७९ शुक्रबार १३:४७:२० | रासस
unn.prixa.net

काठमाण्डाै - आजदेखि नेपाली चलचित्र ‘प्रेमा’ प्रदर्शनमा आएकाे छ । प्रेमकथामा आधारित चलचित्र ‘प्रेमा’ अभिनेता अरुण क्षेत्री र अभिनेत्रीद्वय शुभेच्छा खड्का र सृष्टी श्रेष्ठमै केन्द्रित छ । 

गोविन्दसिंह भण्डारीको लेखन तथा निर्देशन रहेको याे चलचित्रमा अभिनेता क्षेत्रीले आकाश, अभिनेत्री खड्काले प्रेमा र अभिनेत्री श्रेष्ठले निहारिकाको भूमिका निर्वाह गरेका छन् । धनगढीबाट आफ्नी दिदी भिनाजुको घरमामा आएकी प्रेमाले बस बिसौनीमै आकाशलाई झगडा गर्दै गरेको देख्छिन् । प्रेमालाई आकाश गुण्डा झैँ लाग्छ । थुनामा पारेपछि मात्र प्रेमालाई आकाश निर्दोष रहेको थाहा हुन्छ ।

आफ्नो गल्तीलाई भुलाउँदै क्षमा मागेकी प्रेमा बिस्तारै आकाशसँग नजिकिँदै प्रेममा पर्छिन् । यद्दपि भौगोलिकसँगै विचार र व्यवहारमा समेत फरक देखिएको याे जोडीको प्रेममा समस्या आउँछ । दुवै छुटिने बाटोमा पुगेपछि आकाश सडक दुर्घटनामा पर्छन् ।

निहारिकाको कारबाट भएको दुर्घटनाविरुद्ध आकाशले प्रहरीमा मुद्दा नहालेपछि दुवैको भेटघाट बढ्छ । आकाशको व्यक्तित्वले निहारिका आकर्षित भएपछि उनीसँग प्रेम बस्छ । यी दुवैको विवाह हुनै लाग्दा प्रेमा आइपुग्छिन् । त्यसपछि आउने आरोहअवरोहलाई चलचित्रमा देखाइएको छ । 

चलचित्रमा निर्देशक भण्डारीले भनेझैँ आफू प्रस्तुत भएको अभिनेत्री खड्काले बताइन् । 'मलाई सुरूमा यसमा सुहाउँदिनँ कि भन्ने लागेको थियो । यद्यपि निर्देशकले भनेपछि विश्वस्त भएँ ।' 'प्रेम र जीवनको फरक पाटोलाई प्रेमाले बुझाइनँ । यो विसुद्ध प्रेमकथामा बनेको चलचित्र हो ।'

अभिनेत्री खड्काझैँ अभिनेता क्षेत्रीको समेत यो दोस्रो चलचित्र हो । उनले यसमा निर्वाह गरेकाे भूमिका निर्देशककै अनुसार गरिएको बताए । 

'यसमा नयाँ र पुरानो दुवै पुस्ताको प्रतिनिधित्व गरिएको छ । आकाशमार्फत् प्रेमको फरक पाटोलाई चित्रण गर्न खोजेका छौँ', अभिनेता क्षेत्रीले भने, 'प्रेम र आकाशको प्रेममा आउने आरोहअवरोहले अहिलेको पुस्ताको सम्बन्धमा आउने दरार र समाधान बुझाउँछ । यस्तो भूमिकामा देखिने मेरो चाहना पूरा भयो ।' 

निर्देशक भण्डारीले भेटेको एक युवतीको भोगाइलाई ‘प्रेमा’मा मिसाएर चलचित्र लेखेको बताए । 'मैले कतै प्रेमाजस्तै पात्र भेटेको थिएँ । अहिले प्रेममा स–साना कुराले पनि समस्या आउने गरेका छन् । यी सब क्षणिक हुन् । चलचित्र हेरेपछि त्यो थाहा हुन्छ', उनले भने, 'द्वन्द्वप्रधान चलचित्रमार्फत् निर्देशकमा पाइला टेकेँ । यसपछि प्रेमकथानक चलचित्र चार/पाँच वर्षसम्म  बनाउँदिनँ ।' 

प्रेमाको छायाङ्कन काठमाण्डौ, धनगढी र कर्णालीमा  गरिएको हो । चलचित्रमा विमला केसी, हिउँवाला गौतम, पुरण जोशी, सविन बास्तोला, रोशनी स्याङ्बो, प्रकाश बस्नेत, महान थापा, सुरेन्द्र बसेल, भिभियाना थपलियालगायतले अभिनय गरेका छन् । चलचित्र ‘प्रेमा’लाई उपत्यकामा जीजीए ग्रुप र मोफसलमा एफडी कम्पनीले वितरण गरेको हो । 

अन्तिम अपडेट: साउन १, २०८१

उज्यालोका खबर फेसबुक, इन्स्टाग्राम, एक्स ट्वीटरयूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया