चीनमा निर्मित यात्रुवाहक जेट विमानले पहिलो व्यावसायिक उडान सफलतापूर्वक सम्पन्न गरेको छ । एक सय ६४ सिट क्षमता भएको विमान सी–९१९ आज आइतवार शाङ्घाईबाट बेइजिङ गएको बीबीसीले जनाएको छ । एक सय ३० जनाभन्दा धेरै यात्रु बोकेको विमान शाङ्घाईबाट तीन घण्टाभन्दा कम समयमै बेइजिङ पुगेको छ ।

कमर्सियल एभिएशन कर्पोरेशन अफ चाइना (कोम्याक) ले निर्माण गरेको यो विमानले पहिलो परीक्षण उडान सन् २०१७ मै गरेको थियो । त्यसपछि कैयौँ परीक्षण उडानपछि आज पहिलो व्यावसायिक उडान भएको हो ।

सी–९१९ ले फ्रान्सको एअरबस र अमेरिकाको बोइङका जेटहरूको प्रभुत्व तोड्ने चीनको अपेक्षा छ । तर विमान निर्माणमा अझै पनि इन्जिनसहित थुप्रै उपकरणमा पश्चिमी उत्पादनमा निर्भर छ ।

चीनको सरकारी विमान कम्पनी इस्टर्न एअरलाइन्सले पाँच वटा विमान अर्डर गरिसकेको कोम्याकले जनाएको छ । कोम्याकले आउँदो पाँच वर्षमा एक सय ५० वटा विमान उत्पादन गर्ने लक्ष्य लिएको छ । कम्पनीले एक हजार दुई सयभन्दा धरै विमानका लागि अर्डर सुरक्षित गरिसकेको दाबी गरेको बीबीसीले जानएको छ । तर सबैजसो माग घरेलु एअरलाइन्सहरूको मात्रै रहेको छ । चीनका राष्ट्रपती सी जिनपिङले यो उपलब्धि सबैभन्दा नयाँ र महत्त्वपूर्ण रहेको बताउनुभएको छ ।