काठमाण्डाै – नेपाल उद्योग वाणिज्य महासङ्घका अध्यक्ष चन्द्रप्रसाद ढकालले आउँदा दिनमा अर्थतन्त्र थप चलायमान बन्ने बताउनुभएको छ ।

आज शुक्रवार काठमाण्डाैकाे नयाँ बानेश्वरमा अभिनेता दीपकराज गिरी र अभिनेत्री दीपाश्री निरौलाको आईएनआई सिनेमा हलको उद्घाटन गर्दै अध्यक्ष ढकालले यस्तो बताउनुभएको हो । उहाँले अर्थतन्त्र योभन्दा पनि तल खस्किने ठाउँ नरहेको भन्दै अबका दिनमा अर्थतन्त्रले लय समात्ने उल्लेख गर्नुभयाे ।

अध्यक्ष ढकालले व्यावसायिक गतिविधि बढेमात्रै अर्थतन्त्र चलायमान बन्ने बताउनुभयो । उहाँले कोरोना भाइरसकाे सङ्क्रमणपछि अर्थतन्त्र कमजोर बन्दै गएको र व्यावसायिक माहोल बिग्रँदै गएको अवस्थामा सिनेमा हल खुल्नुले आममानिसमा सकारात्मक ऊर्जा थपिने विश्वास व्यक्त गर्नुभयो ।

उहाँले भन्नुभयो, ‘कोभिडपछि आर्थिक गतिविधि कम भइरहेको अवस्थामा सिनेमा हल सञ्चालन गरेर जुन म्यासेज दिनुभएको छ, त्यसका लागि पनि धन्यवाद छ । व्यावसायिक गतिविध जति बढ्छन्, त्यति नै अर्थतन्त्र चलायमान हुँदै जान्छ । अब आउने दिन राम्रो हुनेछ । योभन्दा तल झर्ने अवस्था छैन ।’

अध्यक्ष ढकालले एउटा कलाकारले मेहनत गर्‍याे भने सिनेमा हलको मालिक पनि हुनसक्ने रहेछ भन्ने स्पष्ट सन्देश गएको बताउनुभयो ।