स्याङजा – स्याङजामा चलिरहेको प्याराग्लाइडिङ एक्युरेसी विश्वकप २०१८ का पाँच चरणका खेलहरु सकिएका छन् । 

पाँच चरणका खेल सकिँदा ३ सय ५० फ्लाइट भएका छन् । पाँचौ चरणसम्म आइपुग्दा कोरियाली खेलाडीको वर्चस्व रहेको जिल्ला पर्यटन विकास समितिका उपाध्यक्ष एवं आयोजना सचिवालय संयोजक अनन्त कुमार श्रेष्ठले जानकारी दिनुभयो । 

अब एक चरणको मात्रै प्रतिस्पर्धा हुन वाँकी रहेको छ । एक्युरेसी अन्तर्गतमा भएको यो विश्वकपमा नेपाली खेलाडीले भने राम्रो प्रदर्शन गर्न सकिरहेका छैनन् ।
नेपाली खेलाडी दसौं नम्बरमा रहेका छन् । तोकिएको ठाँउमा अवतरण गर्ने खेलाडीले शून्य र तोकिएको ठाँउभन्दा वाहिर अवतरण गर्नेले बढीमा ५ सय नम्बरसम्म पाउने गर्दछन् । यसमा शून्य नम्बर प्राप्त गर्ने उत्कृष्ट मानिन्छ । 

६ चरणका खेल हुने प्रतियोगिता आइतबारसम्म चल्नेछ भने ६ वटै चरणका अंकहरु जोड गरी विजेत चयन गरिनेछ ।

विश्वकपको लागि नाम दर्ता गराएका ९८ जना खेलाडीमध्ये ७० जना मात्रै  प्रतियोगिताको लागि भाग लिन योग्य पाइएपछि उनीहरुबीच नै प्रतिस्पर्धा भइरहेको छ । 
प्रतियोगिता नेपाल प्याराग्लाइडिङ सङ्घ, नेपाल हवाई खेलकूद संस्था र बाबु एडभेन्चर क्लब स्याङ्जाको आयोजना तथा जिल्ला समन्वय समिति स्याङ्जा तथा स्याङजाका ११ वटै स्थानीय तहको संयोजकत्वमा आयोजना भएको हो ।

भिरकोट नगरपालिका–५ माहापुरमा रहेको स्वरेक मैदानवाट उडेका प्यारागलाइडर वालिङ नगरपालिका–११ डौवा फाँटको तोकिएको घेरा भित्र उत्रनेछन् । खेलको निर्णयको लागि स्वदेशी र विदेशी गरी २० जना निर्णायकहरु खटिएकाछन् । 

प्रतियोगिताका विजयी टिमतर्पm प्रथम, द्वितीय र तृतीय हुनेले क्रमश १५ सय, १२ सय र ७ सय युरो प्राप्त गर्नेछन् । व्यक्तिगततर्फ पहिलो, दोश्रो र तेश्रो हुनेले क्रमशः १ हजार ७ सय ५० र ५ सय युरो प्राप्त गर्ने छन् । 

प्रतियोगिताको बजेट करिब १ करोड ६० लाख रुपैयाँको हुन बताइएको छ ।