कास्की – पोखरा महानगरपालिका–२९ लेखनाथको घोतघोतेमा रहेको दृष्टिविहीन आश्रममा आगलागी भएको छ । आगलागीबाट झन्डै ७५ लाख रुपैयाँ बराबरको सामान नष्ट भएकाे छ । आगलागीबाट पाँच काेठे घर ध्वस्त भएको छ ।

बुधवार बेलुकी आश्रममा आगलागी भएकाे थियाे । दृष्टिविहीन र अपाङ्गगता भएका ३० जना आश्रममा बस्दै आएका थिए । उनीहरूले बजारमा लागेर बेच्ने अगरबत्ती, कपुर, पेन्सल, डटपेन, फिनेल, हार्पिक, अबिर, केशरीलगायतका सामग्री जलेर नष्ट भएका छन् ।

उनीहरूले बजारमा बिक्रीका लागि लैजान लागेका झन्डै ३४ लाख रुपैयाँ बराबरको सामग्री पनि नष्ट भएकाे दृष्टिविहीन सङ्घ कास्कीका अध्यक्ष लक्ष्मण सुवेदीले जानकारी दिनुभयाे । उनीहरूले तिहारकाे बेलामा सामान बिक्रीबाट सङ्कलन गरेर आश्रममा नै रहेकाे झन्डै नाै लाख रुपैयाँ पनि जलेकाे सुवेदीले बताउनुभयाे । आगलागीबाट आश्रममा रहेका खाद्यान्न पनि नष्ट भएका छन् ।

अपाङ्गगतामैत्री समाज कास्कीले घर भाडामा लिएर आश्रम सञ्चालन गर्दै आएको थियो । आगलागीपछि त्यहाँ बस्दै आएकाहरूको बिचल्ली भएको छ ।