काठमाण्डौ – दुर्लभ चरा संरक्षणमा संरक्षणकर्मी जुटेका छन् । चितवनको भरतपुर महानगरपालिका–२६ को दिव्यनगर क्षेत्रमा पाइने दुर्लभ चरा संरक्षणमा संरक्षणकर्मी जुटेका हुन् । पहिले प्रशस्त सङ्ख्यामा पाइने चराहरू अहिले लोप हुन थालेपछि संरक्षणकर्मी चरा संरक्षण र सङ्ख्या बढाउने अभियानमा लागेको चितवन गाइड एसाेसिएसन मेघौली घटघाई उपसमितिका अध्यक्ष एवम् संरक्षणकर्मी मनिष लिम्बूले जानकारी दिनुभयो ।

उहाँका अनुसार दिव्यनगर क्षेत्रका खेतबारीमा विश्वका दुर्लभ चरा देख्न सकिन्छ । चरा संरक्षणका लागि जनचेतना जगाउन वडामा होर्डिङ बोर्ड राखिएको छ । बोर्डमा चरा संरक्षणका बारेमा जानकारी र ३६ प्रकारका चराको सूची राखिएको लिम्बूले बताउनुभयो ।

चरा संरक्षणका लागि वडा नम्बर २६ ले आर्थिक सहयोग गरेको छ । वडाध्यक्ष ज्ञानप्रसाद खनालले यस वर्ष ५० हजार रुपैयाँ बजेट विनियोजन गरेको र आगामी वर्षहरूमा चरा संरक्षणका लागि बजेट थप्दै लैजाने बताउनुभयो । चराविज्ञ हठन चौधरीले चरा संरक्षणका लागि जनचेतान जगाउन आवश्यक रहेको बताउनु भएको छ ।

उहाँले खेतबारीमा रासायनिक विषादी प्रयोग नगर्न किसानलाई अनुरोध गर्नुपर्ने बताउनुभयो । साइबेरिया, काजकिस्तान, मङगोलिया, तिब्बतजस्ता मुलुकबाट नेपालमा दुर्लभ चरा आउने गरेका छन् । नेपालमा आठ सय ९४ प्रजातिका चरा पाइन्छन्  । यसमा ४२ प्रजातिका दुर्लभ चरा चितवनमा छन् ।