बझाङ – बझाङमा सुत्केरी व्यथा लागेपछि समयमै अस्पताल नजाँदा एक जना गर्भवतीको ज्यान गएको छ । केदारस्युँ गाउँपालिका–६ की ४९ वर्षकी गोबडी धामीको सुत्केरी हुने क्रममा आएकाेमा ज्यान गएको जिल्ला अस्पताल बझाङका कार्यालय प्रमुख डाक्टर इन्द्र शाहले जानकारी दिनुभयो ।

बेहोस अवस्थामा अस्पताल ल्याउँदा धामीको अवस्था निकै जटिल भइसकेकोले बचाउन नसकिएको उहाँले बताउनुभयो । अस्पताल पुग्नुअघि नै पेटभित्रै बच्चाको पनि मृत्य भइसकेको थियो । सुत्केरी व्यथा लागेपछि तीन दिनसम्म घरमा बसेकोले अवस्था जटिल भएको पाइएको केदारस्युँ गाउँपालिका उपाध्यक्ष मनिसा धामीले बताउनुभयो । आफूहरूलाई कतैबाट जानकारी नआएको र अन्तिम अवस्थामा जानकारी आएपछि बचाउने प्रयास सफल नभएको उहाँले बताउनुभयो ।

मृतक धामीले गर्भावस्थामा स्वास्थ्य जाँच पनि नगरेको पाइएको छ । बुढेसकालमा गर्भ रह्यो भनेर अरूलाई भन्न लाज हुन्छ भन्दै धामीले गर्भ जाँच गराउन जान नमान्नुभएको उहाँका छिमेकीले बताएका छन् । सुत्केरी व्यथा लागेको समेत जानकारी नदिएको र निकै गाह्रो भएपछि मात्रै जानकारी पाएकोले हतारहतार स्वास्थ्य चौकी पुर्‍याउँदा अवस्था जटिल भइसकेको छिमेकीले बताएका छन् । गाउँको स्वास्थ्य चौकीमा उपचार सम्भव नभएपछि जिल्ला अस्पताल लगिएकोमा त्यहाँ पनि उपचार सम्भव नभएको हो ।