स्याङजा – स्याङजाको वालिङ गरपालिका १० का समाजसेवी हिमनिधि पंगेनीले नगरपालिकाको वडा कार्यालय र तरकारी तथा फलफूल संकलन केन्द्र निर्माणका लागि निःशुल्क जग्गा प्रदान गर्नुभएको छ ।

स्थानीय चलन–चल्ती अनुसार पंगेनीले ४० लाख मूल्य पर्ने ४ आना जग्गा प्रदान गर्नु भएको हो । पंगेनीले जग्गाको लालपूर्जा वालिङ नगरपालिकाका नगर प्रमुख दिलिप प्रताप खाँड, प्रमुख प्रशासकीय अधिकृत गुरुदत्त सुवेदी तथा वडा अध्यक्ष अनन्तराज गैह्रेलाई हस्तान्तरण गर्नु भएको छ ।

संकलन केन्द्रको स्थापनाले किसानहरुको कृषि उपजले छिट्टै बजार पाउने भएपछि निःशुल्क जग्गा उपलब्ध गराएको समाजसेवी पंगेनीले बताउनुभयो । वडामा संकलन गरिएको कृषि उपजहरुको बजारीकरणमा सहजता ल्याउने उद्देश्यले वडामा संकलन केन्द्र निर्माण अगाडि बढाइएको वडा अध्यक्ष गैह्रेले बताउनुभयो ।

वालिङ १० मदीखोलामा केही सार्वजानिक जग्गा र अध्यक्ष स्वयंमको जग्गा समेत रहेकाले त्यहाँ ३ तले भवन निमाण गरी अन्तिममा शित भण्डार, दोस्रोमा शहरी स्वास्थ्य केन्द्र र तेस्रोमा तरकारी तथा फलफूल संकलन केन्द्र बनाउने अवधारण रहेको वडा सचिव दिपेन्द्र गैह्रेले बताउनुभयो ।

निर्माण प्रक्रिया छिट्टै शुरु नगरपालिकाले जनाएको छ । वडाले भवनका लागि ४ लाख रुपैयाँ छुट्याइसकेको र नगरपालिकाबाट समेत केही बजेट छुट्याइने वडासचिव गैह्रेले बताउनुभयो ।