पर्वत – कुश्मा नगरपालिका ३ दुर्लुङ ढकालबारीमा पहिरोमा बेपत्ता एक बालकको अवस्था अझै थाहा हुन सकेको छैन । शनिबार राति र आइतबार दिनभर सुरक्षाकर्मीले खोजी गरे पनि पहिरोमा हराएका १३ वर्षीय बालक जेनिस विक फेला नपरेका हुन् ।

साेमबार बिहानैदेखि सुरक्षा निकाय र स्थानीयवासी खोजीमा जुटिरहेको पर्वतका प्रमुख जिल्ला अधिकारी शम्भुप्रसाद रेग्मीले जानकारी दिनुभयो । तर बिहानदेखि पानी परिरहेकाेले खोजीमा समस्या भइरहेको कुश्मा नगरपालिका ३ दुर्लुङका वडाध्यक्ष तेजप्रसाद पाध्याले बताउनुभयो ।

शनिबार राति तीन जना र आइतबार दिउँसोसम्म पाँच जना गरी आठ जनाको शव भेटिएको थियो । पहिरोमा पुरिएर आठ जनाको ज्यान गएपछि दुर्लुङ गाउँ अहिले शोकमा डुबेको छ । प्रदेश सरकारले मृतकका परिवारलाई जनही ५० हजार रुपैयाँको दरले राहत रकम प्रदान गरेको छ ।

त्यस्तै जिल्लास्तरीय विपद् कोषबाट प्रमुख जिल्ला अधिकारी शम्भुप्रसाद रेग्मीले प्रतिपरिवारलाई एक लाख रुपैयाँ प्रदान गर्नुभएको छ ।