रामेछाप – रामेछापको गोकुलगंगा गाउँपालिका –२ ठोसेमा आगलागी पीडितलाई राहत प्रदान गरिएको छ । गएको सोमबार राति घरमा भएको आगलागीबाट ज्यान गुमाउनुभएकी ८० वर्षीया पासाङलेकी शेर्पाका परिवारलाई जिल्ला विपद् व्यवस्थापन समितिले राहत प्रदान गरेको हो ।

घरको अँगेनाबाट सल्केको आगोले शेर्पाको घर पनि पूर्णरुपमा जलेको थियो । आगलागीमा परेर ज्यान गुमाउनुभएकी शेर्पाको घरमै पुगेर जिल्ला विपद् व्यवस्थापन समितिका अध्यक्ष तथा रामेछापका प्रमुख जिल्ला अधिकारी अर्जुनकुमार शर्माले दुई लाख १५ हजार रकम प्रदान गर्नुभएको हो ।

त्यसबाहेक पीडित परिवारलाई नेपाल रेडक्रस सोसाइटीबाट लत्ता कपडा, त्रीपाल, भाँडाकुडा लगाएतका सामाग्रीहरु समेत प्रदान गरिएको छ । त्यस्तै गोकुलगंगा गाउँपालिकाकाे तर्फबाट पनि मृतकका परिवारलाई ५० हजार रुपैयाँ नगद र खाद्यान्न लगाएतका सामाग्रीहरु प्रदान गरिएकाे छ ।